دافع الإعلامي أحمد شوبير، خلال حديثه في برنامج «الناظر» المذاع عبر قناة النهار، عن القرارات التحكيمية التي شهدتها مباريات الأهلي الأخيرة، مؤكدًا أن غالبية خبراء التحكيم في مصر أجمعوا على صحتها.

وقال شوبير: «كل خبراء التحكيم في مصر بمختلف ميولهم أجمعوا على صحة قرارات التحكيم في مباراتي الأهلي، طيب نعمل إيه؟ نغير القانون علشان نرضي حضرتك! نرسم خط التسلل غلط مثلًا علشان حضرتك ترتاح!».

وأشار إلى أن جميع خبراء التحكيم، باستثناء جهاد جريشة، أجمعوا على صحة ركلة الجزاء التي حصل عليها الأهلي أمام الشرقية للدخان، موضحًا: «يعني 10 اتكلموا مثلًا النتيجة 9 قصاد 1».

وأضاف شوبير: «هو حرام إن الأهلي ياخد حقه؟ طب ما الزمالك كسب 3 والناس طلعت قالت لعبة أحمد فتوح وطرد وفي قصة، لكن معلقناش هنا ولا قلنا حاجة».

وأكد أنه لا ينحاز إلى الأهلي أو الزمالك، قائلًا: «إحنا لا بتوع أهلي ولا زمالك، لكن اللي بيحصل ده من ردود أفعال غريبة غير مقبول ومعرفش على إيه».

واختتم حديثه بالتأكيد على أن الهدف هو إقامة مسابقة عادلة، قائلًا: «إحنا مش عايزين غير مسابقة صح، ومفيش أي حاجة حصلت غير إنه الأهلي بياخد حقه زيه زي الباقي».