تحدث أحمد سامي، مدافع بيراميدز، عن خسارة فريقه لقب الدوري، مؤكدًا أن بيراميدز كرر نفس أخطاء الموسم الماضي، ما تسبب في ضياع البطولة بفارق نقطتين.
وقال سامي: "الدوري ده أنا بشبهه بالسنة اللي فاتت، بقول إنه اتسرق مننا، فيه ماتشات كتير جدًا ضاعت مننا، ودي اللي أثرت علينا في نهاية الدوري".
وأضاف: "خسرنا الدوري بفارق نقطتين، والسنة اللي فاتت نفس الموضوع.. متعلمناش الدرس كويس، ومعرفناش نحافظ على النقط السهلة".
كما نفى مدافع بيراميدز وجود اختلاف في تركيز اللاعبين بين مواجهات الأهلي والزمالك، مشددًا على أن الفريق يتعامل مع المباراتين بنفس الأهمية "فيه معلومة مغلوطة إن تركيزنا قدام الأهلي أعلى من الزمالك.. ماتش الأهلي وماتش الزمالك هما أكبر ماتشين في الموسم، واللعيبة بتبقى مركزة بنفس الدرجة".
وأشار سامي إلى أن الفارق يعود إلى طبيعة المباريات، موضحًا أن الأهلي يمنح بيراميدز مساحات أكبر بسبب اللعب المفتوح، بينما يعتمد الزمالك على التنظيم الدفاعي والهجمات المرتدة "الأهلي بيلعب معانا جيم مفتوح، فبتظهر مساحات نعرف نستغلها، لكن الزمالك بيقفل كويس جدًا وبيعتمد على المرتدات، وده بيصعب الأمور علينا".
وأضاف: "ماتش الأهلي بتبقى موفق إن الفرص اللي بتجيلك تقدر تسجل منها، لكن قدام الزمالك ممكن الفرص تيجي وما تعرفش تسجل، فشكل الماتش بيختلف مفيش تخاذل في ماتش الزمالك، ومفيش إننا بنركز في ماتش وماتش لا.. الكلام ده عارٍ تمامًا من الصحة".