أشاد حازم إمام، نجم الزمالك ومنتخب مصر السابق والمحلل الفني الحالي، بالتنافسية العالية في الدوري الإماراتي للمحترفين، مؤكدًا أن تنوع الأبطال خلال السنوات الأخيرة يعكس قوة البطولة وتوازنها، وهو أمر نادر الحدوث في الدوريات الكبرى حول العالم.

وقال حازم إمام، خلال تحليله عبر قناة أبو ظبي الرياضية:"من الحاجات اللي عجبتني في الدوري الإماراتي إن في آخر 10 سنين فيه خمس أبطال مختلفين للدوري، زي العين، شباب الأهلي، الجزيرة، الوصل، والشارقة. دا بيدل على إن مفيش سيطرة مطلقة من فريق أو فريقين، وده بيخلي كل الأندية عندها أمل حقيقي إنها تنافس وتفوز باللقب."

وأضاف:"في معظم دوريات العالم بنشوف سيطرة واضحة من فريقين على الأكثر، زي ما كان الحال في إنجلترا مع مانشستر سيتي وليفربول، أو في الماضي مانشستر يونايتد وآرسنال، وفي إيطاليا شفنا ميلان وإنتر، وبعدهم سيطرة طويلة ليوفنتوس. أما في الإمارات، فالوضع مختلف تمامًا."

وأوضح:"لما يكون في أكتر من 5 أو 6 فرق ممكن تنافس على اللقب، ده بيخلي كل مباراة مهمة وكل جولة مؤثرة. بتلاقي مواجهات زي العين وشباب الأهلي، أو الوصل مع الجزيرة، كلها مواجهات قوية وجاذبة للجماهير، مش بس منتظر ماتش واحد أو اتنين كبار في الموسم."

واختتم:"الطموح موجود عند كل الفرق من بداية الموسم، مفيش فريق داخل البطولة وهو فاقد الأمل. ده بيأثر بشكل إيجابي على أداء اللاعبين، وعلى مستوى البطولة ككل من الناحية التسويقية والإعلامية."