رد الإعلامي أحمد شوبير على تصريحات الكابتن مصطفى يونس، التي تحدث فيها عن واقعة قديمة تم الزج باسمه فيها، مشيرًا إلى أن ما تم تداوله غير دقيق ويحتاج إلى توضيح.
وقال شوبير عبر برنامجه على قناة "الأهلي":"أنا آسف والله، ومرة تانية آسف، ومرة تالتة آسف، لكن لازم أرد هنا. كابتن مصطفى يونس قال مبارح موضوع وذكر اسمي، لكن المعلومة اللي قالها خطأ، وحبيت أوضحها لأن عندي علاقة طيبة بيه".
وتابع شوبير:"كابتن مصطفى قال إن حصل حاجة بيني وبين الكابتن صالح سليم، وإن أنا قدمت بلاغ ضده بسبب حاجة تخص سيف وقصة وحدوتة. الحقيقة إن ده محصلش إطلاقًا. أنا عمري ما قدمت بلاغ ضد الكابتن صالح سليم، ولا ضد أي حد".
وأوضح تفاصيل الواقعة قائلًا:"اللي حصل وقتها إن صحفي – ما زال على قيد الحياة – اختلق حوار على لساني، وراح نشره على أربع صفحات في مجلته بشكل غريب، وأنا نفسي اتخضيت. فنفيت الكلام في نفس اللحظة، لكن حصل تحقيق معايا داخل النادي، وجبت المحامي الكبير أستاذ علي الجمل، وخضعت للتحقيق بشكل محترم".
وأضاف:"بعد التحقيق، مجلس إدارة النادي الأهلي قرر إيقافي لمدة ستة أشهر. وقتها شعرت بالظلم، وسألت هل أقدم التماس؟ قالوا لا. فقررت اللجوء للقضاء الإداري تظلمًا من القرار، وكسبت القضية من أول جلسة، وانتهى الموضوع عند هذا الحد".
وأكد شوبير:"لم أجرّس حد، ولا كلمت على حد، واللي حصل كان بشكل قانوني ومحترم. ومافيش حاجة اسمها الكابتن صالح شال الورقة، ده كان قرار مجلس إدارة، مش قرار فرد".
ووجه شوبير رسالة مباشرة ليونس قائلًا:"كابتن مصطفى، من فضلك لو عندك حاجة أو مستندات قدمها للنائب العام، وأنا ناشدتك بكده قبل كده. لو شايف إن معاك حاجة مهمة او فيها اخطاء، قدمها من فضلك، ومتلومش على اللي بيقدم بلاغات فيك لأنك وجهت اتهامات، فده حقهم القانوني".
واختتم قائلًا:"أرجوك كابتن مصطفى، حافظ على الرصيد اللي عندك. أنت نجم كبير وكابتن للنادي الأهلي ومنتخب مصر. وقولا واحد محمود الخطيب راجل عفيف اليد وعفيف اللسان وده قولا واحدا".
وتابع: "وأنا عمري ما هغلط فيك أو ألمّح بأي حاجة، بس لأن اسمي اتقال، فكان لازم أوضح. كمان بالنسبة لزميل إعلامي اتكلمت عنه إنه بياخد رقم معين، أحب أوضح إنه الرقم اللي قلته بعيد تمامًا عن الحقيقة، وما وصلش حتى لنصه".