تحدث الإعلامي خالد الغندور عبر إذاعة أون سبورت إف إم عن أداء طاهر محمد طاهر مع النادي الأهلي خلال الفترة الماضية وإمكانيات اللاعب الجيدة.
وقال الغندور:" طبعًا طاهر مكنش بياخد حقه كانت كل الناس مركزة علي سطلانه ، الي كان عملها وقت نهائي الوداد ، لكن طاهر محمد طاهر مش سطلانة لاعيب جيد جدًا جدًا جدًا لاعيب قوي بدنيًا وحريف وكان في المقاولون العرب يقولك دة خليفة محمد صلاح ومتعلم كويس بيعرف يتكلم فرنساوي ، وكل شوية الجماهير يقولك طاهر لازم يمشي".
وتابع:" أي مدرب أجنبي يجي الأهلي يقتنع بيه ويخليه يلعب في المكان دة علي نجوم كبار أوي في المنطقة دي ، وأنا بقولكم من دلوقتي زيزو الي راح بلغط كبير جدًا هيلعب مكان طاهر ، طاهر من اللاعيبة الي مش سهل تلعب عليها لو هو سليم 100% لأنه من اللاعيبة القلائل الي بيلعبوا علي الطرف وبيدافعوا دفاع مستميت".
وأضاف:" بيدافع بكل قوة ويضغط بكل قوة بيضغط بكل قوة في بعض الأحيان بيرفع بيعمل أسيستات بيجيب أجوان لو في هجوم من ناحية الشمال بيكمل ويجيب أجوان وبيشوط وخلي بالكم إن طاهر لاعيب مهم بالنسبة لحسام حسن ولعب مع منتخب مصر لكن جاتله الإصابة بعدته".
وأكمل:" عيبه الوحيد أنه كثير الإصابات شكل جسمه وتكوين جسمه البدني أو العضلات بيأدي أنه بيجيله إصابات كتيرة جدًا والغريب إن إصاباته بتطول العضلية ، يعني ممكن يقعد 3 شهور في إصابة عضلية فتحس اية دة غريبة جدًا مش إصابة كتيرة تحس إن طاهر بيغيب كتير لكنه مؤثر ومهم وكل المدربين الأجانب بيقتنعوا بيه".
وجدير بالذكر أن خالد الغندور رفض في بداية الموسم المقارنات بين أحمد سيد زيزو وطاهر محمد عندما سجل طاهر مع منتخب مصر، وقيل أن طاهر يقدم مستوى أفضل من زيزو رفض الغندور المقارنة بينهم، وفي الوقت الحالي يحذر زيزو من اللعب أساسي على حساب طاهر في الأهلي ليس سهل.