شن الإعلامي أحمد شوبير، حارس مرمى الأهلي ومنتخب مصر السابق، هجومًا حادًا على محمد شيحة، نائب رئيس نادي الإسماعيلي السابق، على خلفية البيان الذي أصدره الأخير وهاجم فيه مجلس إدارة النادي الحالي برئاسة المهندس نصر أبو الحسن.
وقال شوبير خلال تصريحاته الإذاعية صباح اليوم الإثنين:"أنا أول المتعاطفين مع النادي الإسماعيلي، لكن في ناس بتحاول استغلال الوضع الصعب للنادي لتحقيق مكاسب شخصية، وده غير مقبول".
وأضاف: "الصديق العزيز محمد شيحة كتب بيانًا بصفته رقم 1 في جبهة الإنقاذ، يطالب فيه مجلس الإدارة بالاستقالة بعد مباراة الفريق أمام غزل المحلة، وإلا تتم الدعوة لجمعية عمومية طارئة لسحب الثقة!".
وتابع "بجد؟ الإسماعيلي بيصارع الهبوط وأنت بتتكلم عن استقالات؟ ما حضرتك كنت في الإدارة من كام شهر، عملت إيه؟ المشكلة ما اتحلتش، دلوقتي بتسخن الرأي العام، وبتقول النادي غارق في الديون.. طب ما أنت كنت ماسك، ليه ما حليتش الأزمة؟".
وتابع: "كل اللي بيحصل هجوم من غير حلول. اللي عنده كلمة طيبة أو فرصة للحل يقدّمها، مش كله ضرب وخلاص، الناس دي كانت في موقع المسؤولية ومفيش حد بيساعد فعليًا".
واختتم شوبير:"أنا لا أرى أحدًا يغار على الإسماعيلي مثل الدكتور عبد المنعم عمارة، والكابتن علي أبو جريشة، واللاعبين القدامى زي سيد عبد الرازق، فيه حاجة مش طبيعية بتحصل، والنادي في وضع لا يتحمل مزايدات أو تصفية حسابات".