أكد حلمي طولان المدير الفني السابق لنادي إنبي أنه من غير المنطقي أن يقوم بمهاجمة النادي الأهلي من أجل إرضاء جماهير الزمالك.
وقال حلمي طولان خلال حديثه عبر قناة الحياة: "ظهوري على قناة الأهلي؟ أنا بظهر كتير جدا مش أول مرة، أنا وكابتن نادي الزمالك كابتن طه بصري كنا متعاقدين مع القناة بنحلل ماتشات الدوري في فترة سابقة".
وأضاف: "لما أشوف حاجة محترمة وكيان بيدار بشكل محترم والناس بتوعه بيحترموني وبيقدروني هل من المنطق ومن المعقول ومن المقبول أن أنا أطلع اتكلم بشكل سلبي عن الناس دي؟ لا يمكن هعمل كدة ولا ده هيحصل مني".
وأكمل: "مش معنى كدة أني مش زملكاوي لأ أنا زملكاوي حتى النخاع لكن لما أشوف مؤسسة محترمة زي النادي الأهلي بتدار بشكل محترم وعلى رأسها صديق عمر هل من المنطق ومن الاحترام أني أطلع أشتم صديق عمري وأتهجم على المؤسسة اللي بيديرها؟ مش منطقي خالص".
وأتم حلمي طولان حديثه: "مفيش أي خلاف بيني وبين إدارة الزمالك، بيزعلوا مني علشان في ماتشات الزمالك ممكن أكسب وده بيزعل جمهور الزمالك.. أو أني بتكلم على النادي الأهلي بشكل إيجابي الجماهير المتعصبة بتزعل لكن الجماهير الواعية مش بتزعل وأنا مفيش أي حاجة بيني وبين إدارة الزمالك".