منح وائل جمعة مدافع النادي الأهلي ومنتخب السابق درسًا لعدد من اللاعبين الذين خدعوا الأهلي خلال الفترة الماضية وتحديدًا وقت التعاقدات.
وقال جمعة في حوار مطول خلال برنامج إذاعي يقدمه الإعلامي الشهير محمد سعدون الكواري "الي انا شوفته الموسم ده والي فات في ملف الانتقالات كان أمر صعب جدًا، الموضوع جه من أسماء محسوبة انهم أولاد النادي، ليهم تاريخ واسم في النادي وجمهور الأهلي بيعتبرهم من رموز واساطير في النادي".
وتابع "أولا اللعيبة دي مشافتش يوم وحش في النادي الأهلي، النادي تعامل معاهم أفضل ما يكون، عرض عليهم ما لم يعرض على ناس في جيلي وقبلي عملوا حاجات أفضل منهم، بتكلم تحديدًا في الـ 4 او 5 لعيبة في الموسمين الي فاتوا بدايًة من عبد الله السعيد، الأهلي مقصرش معاهم في أي حاجة".
وأضاف الصخرة "اتفهم نقطة الدفاع عن رحيلهم عن الأهلي بالشكل ده ان عمر اللاعب في الملاعب قصير ومحتاج يأمن مستقبله مع لعيب عنده 37 ولا 38 سنة في آخر مشواره، لكن في النهاية برضه الأهلي لا يجبرك انك تقعد في النادي بدون مقابل".
وواصل "انت هتاخد مقابل لكن اقل من الي هتاخده في مكان تاني بحاجة بسيطة، هتعوض الفارق في حب الجمهور وجماهيرية النادي وجماهيريتك في تعامل الناس معاك وانت لاعب في الأهلي واحترامك للنادي الي ساعدك يبقى ليك اسم والناس تغني بإسمك، النادي ميستحقش منك الي انت عملته ده".
واستمر جمعة في توصيل رسالته قائلًا "كل ملف من دول انا عارف تفاصيل العروض الي اتعرضت عليهم وتفاصيل أزمتهم، الأهلي مقصرش معاهم تمامًا، هم خدعوا النادي في أكثر من موقف، كلهم شبه بعض في خداع الأهلي، دي اكتر حاجة ضايقتني منهم، بسبب عدم وضوحهم، النادي متفق معاك وانت متفق مع نادي تاني، دي خيانة من الضهر".
وعن عبد الله السعيد، قال جمعة "عامل الخداع كان موجود في روايات اللعيبة الخمسة او الستة، عبد الله في معلومة اتقالت مش متأكد منها ان كابتن سيد عبد الحفيظ مدير الكرة قاله شوف مصلحتك لو الكلام ده حقيقي هشوف ان عبد الله عمل الطبيعي، راح اتفاوض مع الزمالك، وده العذر الوحيد له لو صح، لكن مش متاكد من مصداقية ده".
وتطرق جمعة للحديث عن عصام الحضري الحارس الهارب من صفوف النادي الأهلي قائلًا "قراره من اسوا القرارات الي اخدها في حياته".
متابعًا "عصام اسطورة الكرة المصرية في حراسة المرمى، الأهلي مش بيقصر مع حد، كل لاعب بيحسبها بطريقته، لكن اغلب الحالات كانت حسبتها غلط، الأهلي عمره ما ضر لاعب او منعه من الخير، النادي بيقدرك، وعصام اخطأ وهو نفسه لحد دلوقتي بيندم".
واستمر وائل في حديثه "شوف تصريحاته ولما اتسأل عن رمضان صبحي، هو خسر جمهور الأهلي بالفعل لكن يبقى واحد من اساطير الكرة المصرية".
وأختتم وائل جمعة تصريحاته قائلًا "لما اللاعب بيمشي بيبقى فاكر انه هيخدع الجمهور، عاوز يمشي وياخد فلوس وحب وشعبية وشهرة ونجومية، مفيش حد بياخد كل ده مع بعض، لازم يكون في جانب من التضحية من اللاعب مقابل الحب الي بياخده".
طالع أيضًا:
جمعة يوجه رسالة لرمضان صبحي: الأهلي الي عملك ورجعك لاعب تاني ولمعك وفي الأخر طعنته
جمعة عن حسام عاشور: مالهوش تأثير مع الأهلي آخر 4 سنين.. تاريخه في النادي وفي النهاية خدع الكل
وائل جمعة يتحدث عن تريكة كما لم تسمعه من قبل: أنا وهو معندناش فكرة.. يؤخذ عليه هذا الأمر وأعارضه فيه
وائل جمعة: الزمالك فاز على الأهلي واحتفلوا رغم المعاناة أمام فرق هابطة.. بطولاتهم هي هزيمة الأهلي
وائل جمعة عن تصريحات شوقي السعيد: لست متكبرًا ولكن مسيرته وإنجازاته ترد عليه