فاجأ طارق يحيى مشاهدي قناة الزمالك بالهجوم على اللجنة المؤقتة التي تدير النادي بعد قرار إيقاف واستبعاد مجلس مرتضى منصور.

وقال طارق يحيى في مقدمة برنامجه عبر قناة الزمالك: "أنا مش فاهم حاجة، هو ايه اللي بيحصل؟، صفقات بنتراجع عنها، فلان يتخانق مع فلان، أجيب فلان أمضيه عقود واتراجع تاني، واحط أسماء في لجنة الكرة وارجع أشيلها، تصريحات غريبة، استقالة عضو من اللجنة بسبب الخلافات".

وواصل طارق يحيى هجومه على اللجنة المؤقتة: "تاريخ الزمالك كبير، محتاجين تكاتف أكتر، الدوري بعد بكره، ليه نصدر بيان في الوقت ده، ايه لازمته، مش قادر أفهم إيه اللي بيحصل في الزمالك، ليه نصدر بيان في الوقت ده، هنغلط تاني، جمهور الزمالك ذنبه إيه"".

وأضاف طارق يحيى: "محدش يزعل مني، باتكلم من حرقتي على الزمالك، الأشخاص ماشيين، النادي هو اللي باقي، ساسي هنتفق معاه وبعدين نأجل الاجتماع، لو مش قادرين تديروا النادي قولوا، اللي بيحصل في الزمالك النهاردة مالوش غير معنى واحد مش عاوز أقوله ومش هينفع أقوله، اللي مش قادر يتحمل مسئولية الزمالك يمشي، أنا خايف على نادي الزمالك، ما بتفرقش معايا مناصب ممكن أمشي".

وتابع طارق يحيى هجومه: "كل يوم لجان تنبثق عن لجان وتضربوا النجوم في بعض، لو مش قادرين بلاش يا جماعة، بقالنا 4 5 أيام بنقول بكرة أحلى، عندنا في حاجات في النادي صعبة جدا محدش قادر يصدق، مفيش نوع من أنواع الاتفاق في الرأي نعتذر، معالي الوزير شكرا".

وأوضح يحيى: "اللي بيحصل في الزمالك مينفعناش، الزمالك أكبر من أي حد، بنتكلم من منطلق حرصنا على مصلحة الزمالك، كل الناس ليها كل التقدير، اديني شغل، اديني حاجة في ايدي أمسكها".

وواصل يحيى تصريحاته: " عملنا صفقتين من خلال الإخوة في اللجنة المؤقتة وفشلوا، كانوا معمولين أساسا وكانت متقشرة مكنتش محتاجة نفتي ونعمل، الجون فاضين جايلك لعيب فري لكن كده ما ينفعش لازم نكون صرحاء مع جمهور الزمالك".

واختتم طارق يحيى هجومه الذي استمر أكثر من ربع ساعة: "ليه بتشتغلوا لمصلحتكم الشخصية، لو مش قادر تاخد قرار شكرا".