تحدث عبد الحميد حسن ميدو المدرب العام السابق بالجهاز الفني للفريق الأول لكرة القدم بنادي سيراميكا كليوباترا عن ركلة الجزاء التي تم احتسابها لنادي الزمالك أمام فريق فيوتشر بالدوري العام، والتي أقيمت مساء أمس الأربعاء.
وقال عبد الحميد حسن في مقطع فيديو نشره عبر حسابه الشخصي على موقع التواصل الاجتماعي إنستجرام: "أنا مش قادر اسكت، بتفرج على ماتش الزمالك وفيوتشر والماتش لسة شغال وكان فيوتشر متقدم 2/0 وفجأة ضربة جزاء للزمالك بداعي أن أسامة الجزيري اتشد داخل منطقة الجزاء".
وأضاف: "كابتن محمد الحنفي شايف أنه اتشد مفيش أي مشكلة خالص، كابتن محمد عادل لم يستدعيه للفار يبقى الكورة ضربة جزاء، بس أنا عندي مشكلة كبيرة جدا، كابتن عصام عبد الفتاح لو سمحت لو دي ضربة جزاء يبقى ضربة جزاء سيراميكا قدام الزمالك اللي أنت بعتها للفيفا اللي كانت مصيبة سودا وطلعت دافعت باستماته عنها وقولت هبعتها للفيفا والفيفا قالت دي مش ضربة جزاء".
وتابع: "في ركلة جزاء سيراميكا اللي لاعبنا اتضرب بالكوع وقلع التيشيرت، محمد معروف كان حكم صفارة والكابتن الحنفي على الفار اللي شاف دي ضربة جزاء، دي مشكلتي، احسب زي ما تحسب بس متفصلش القانون على مزاجك، أنت فيك حاجة من صفات ربنا العدل، هو مش في ناس بتشتغل وتتعتب علشان يحاربوا في الماتشات ويكسبوا أو يتعادلوا أو يطلعوا بأي نتيجة إيجابية أنت بتهدم كل ده في ثانية علشان في أهواء بتحصل".
وأكمل: "لو شايف أن دي ضربة جزاء وماكنتش شايف سيراميكا ليها ضربة جزاء فدي مصيبة سودا، كابتن عصام عبد الفتاح لو شايف أن دي ضربة جزاء وبتاعت سيراميكا مش ضربة جزاء يبقى دي مصيبة سودا، أنتوا كدة هتعملولنا شيزوفرينيا حادة يا جماعة احترموا اننا عندنا عقول وبنفكر احترموا الناس شوية انتوا كدة مش بتحترموا حد خالص".
وأتم ميدو حديثه: "أنا معنديش مشكلة احسب 900 ضربة جزاء بس كيل بمكيال واحد متحسبش بـ 600 مكيال انا محتاج رد كابتن معروف وكابتن حنفي دي ضربة جزاء وبتاعتنا مكانتش ضربة جزاء؟، يا جماعة احترموا عقول الناس شوية.. كابتن عصام عبد الفتاح محتاج من حضرتك رد".