واصل الإعلامي أحمد شوبير تحذيراته المستمرة من الغاء الدوري المصري نتيجة قرارات اللجنة الثلاثية التي تدير الكرة المصرية برئاسة أحمد مجاهد.

وقال شوبير في برنامجه الإذاعي مع شوبير صباح اليوم الاثنين "قلت في العناوين ان الدوري في خطر، أيوة وبعلنها من تاني الدوري في خطر".

وتابع "أولًا ألف سلامة على لاعبي الاتحاد السكندري عندهم 11 حالة كورونا، وقالوا ان التأجيل هيبقى لحد أول شهر مارس، طيب ما تخلوها في عيد الأم أحسن علشان نغني ماما زمانها جاية وتبقى شكلها أحلى".

وأضاف "الحقيقة ان وقت لجنة المسابقات السابقة برئاسة مازن مرزوق أيام ما كان عندنا لجنة مسابقات قالت للأندية ان تأجيل المباريات يكون في حالة وجود 15 مصاب بفيروس كورونا بسبب وجود لعيبة كتير في قائمة الفريق، والأندية وافقت على كدة".

وواصل شوبير "ولكن اللجنة الحالية، الي جميل راتب بيترأس فيها كل اللجان، كل اللجان من أولها لآخرها، وعلى فكرة دي مش سخرية، هم عاملين زي فيلم البداية بتلاقي جميل راتب هو الي ماسك كل حاجة، لجنة التطبيع الأحادية".

وأردف "اللجنة قالت لما نادي يكون عنده 5 حالات ابعتولنا واحنا نشوف، لا لوم على الأندية، ماشية بمبدأ لو في حد حبيبنا ممكن يبقوا 4 حالات كورونا، ولو حد حبيبنا قوي ممكن يبقوا 3، ولو في نادي لعيبته عندها صداع ممكن برضه نأجلهم، رجعنا زي زمان بنشتغل على الهوى والمزاج وعلى حسب الماتش عاجبني ولا لا والإدارة دي بحبها ولا لا ومبدأ اخاصمك أها أصالحك لا".