رد طارق يحيى على قرار إيقافه وإحالته للتحقيق من قبل اللجنة المؤقتة التي تدير الزمالك بأنه يجب أن يتحدث لأن حديثه هو رد الفعل.

وأضاف طارق يحيى عبر قناة الزمالك: "أنا ما بتفرقش معايا ، موضوع الإيقاف أو التحقيق ما أنا لازم أقول، ده رد الفعل أنا باتكلم لمصلحة الزمالك، أنا ما يهمنيش حد، أنا باتكلم لمصلحة الزمالك، أنا لا يهمني كرسي ولا يهمني أي حاجة".

وتابع طاق يحيى: "كلنا مع نادي الزمالك، الزمالك هو نادينا وهو اللي عملنا، ما بنتغناش بده، الناس كلها عارفة لولا الزمالك وبعد دعاء أبويا وامي ما كنتش أوصل لهذه المكانة".

وأكد فوزي العريان المستشار القانوني بنادي الزمالك أنه تم إبلاغه من هشام ابراهيم نائب رئيس اللجنة المكلفة بإدارة النادي بإيقاف طارق يحيى المشرف العام على قطاع الناشئين.

وحسب الموقع الرسمي لنادي الزمالك فقد تم إحالة طارق يحيى للتحقيق لما بدر منه تجاه اللجنة في برنامج "زمالكاوي" المذاع على قناة نادي الزمالك.

وقال طارق يحيى في مقدمة برنامجه عبر قناة الزمالك: "أنا مش فاهم حاجة، هو ايه اللي بيحصل؟، صفقات بنتراجع عنها، فلان يتخانق مع فلان، أجيب فلان أمضيه عقود واتراجع تاني، واحط أسماء في لجنة الكرة وارجع أشيلها، تصريحات غريبة، استقالة عضو من اللجنة بسبب الخلافات".

وأضاف طارق يحيى: "محدش يزعل مني، باتكلم من حرقتي على الزمالك، الأشخاص ماشيين، النادي هو اللي باقي، ساسي هنتفق معاه وبعدين نأجل الاجتماع، لو مش قادرين تديروا النادي قولوا، اللي بيحصل ي الزمالك النهاردة مالوش غير معنى واحد مش عاوز أقوله ومش هينفع أقوله، اللي مش قادر يتحمل مسئولية الزمالك يمشي، أنا خايف على نادي الزمالك، ما بتفرقش معايا مناصب ممكن أمشي".

وتابع طارق يحيى هجومه: "كل يوم لجان تنبثق عن لجان وتضربوا النجوم في بعض، لو مش قادرين بلاش يا جماعة، بقالنا 4 5 أيام بنقول بكرة أحلى، عندنا في حاجات في النادي صعبة جدا محدش قادر يصدق، مفيش نوع من أنواع الاتفاق في الرأي نعتذر، معالي الوزير شكرا".