كشف أحمد حسن لاعب الأهلي ومنتخب مصر السابق عن كواليس غضبه من محمد أبو تريكة أسطورة القلعة الحمراء خلال احدى مباريات الأهلي أمام الترسانة.

وقال أحمد حسن في تصريحاته لقناة أون تايم سبورت أمس الخميس "في ماتش قصاد الترسانة كسبنا فيه 3-2، وفي المباراة دي انا عملت كل حاجة في الماتش، اتسببت في ضربة جزاء للترسانة وصنعت وسجل جول للأهلي، كنت بعمل كل حاجة في الملعب".

وأضاف "تريكة في المباراة دي مكنش موفق تمامًا، بعد المباراة جوزيه جه وقال لتريكة اتفرج واتعلم منه قوة الشخصية وشاور عليا".

وأستكمل لاعب اندرلخت السابق "أبو تريكة مؤدب ومش بيرد فأنا هزرت معاه قولتله كل مرة هاجي أقولك اتعلم؟، لكن اتفاجئت برده عليا وقالي أتعلم منك ليه هو انت عندك فكرة، الرد ده زعلني جدًا".

متابعًا "في نفس اليوم ده كان فرح أختي في أحد الفنادق القريبة من الملعب، والمباراة خلصت الساعة 11 والفرح مبدأش غير لما انا رحت، فجأة الساعة 1 الفجر لقيت تريكة داخل علينا الفرح وهو عادًة مش بيروح أفراح".

وأردف أحمد حسن "لقيت تريكة داخل الفرح بيصالحني وبيحضر الفرح وفجأة لقيت الناس اتلمت في القاعة وده خلاني قلتله هو 5 دقائق وتمشي علشان الفرح يكمل على خير".