هدد رضا عبد العال نجم الأهلي والزمالك رئيس نادي الزمالك الحالي مرتضى منصور بكشف الفضائح التي تحدث داخل جدران النادي الأبيض في حالة استمرار هجومه عليه.
وسخر مرتضى منصور من رضا عبد العال وتوقعاته بعد أن توقع أن مباراة السوبر الافريقي ستكون صعبة على الزمالك أمام الترجي ولكن الفريق التونسي خسر اللقب لصالح الزمالك.
وقال رضا في تصريحات تلفزيونية عبر قناة TEN"الناس بتقول ان توقعاتي غلط في ماتش السوبر الافريقي وانا أصلا متوقعتش النتيجة، وفوجئت برئيس الزمالك طالع يقول عليا رضا عبد المعطي وانه ناسي اسمي".
وأضاف رضا "مينفعش الكلام ده، هو انت علشان خاطر ابنك هتطفش الناس كلها؟، بتقارن أمير بيا ازاي وبتقول امير الي مش عاجبك جاب بطولتين، هو أمير الي صد ضربة جزاء أو سجل جول بن شرقي مثلًا؟".
وأستكمل عبد العال تصريحاته "انت جيت على اللعيبة الي شالت الطين في الماتشين والجماهير أصحاب الفضل في الفوز باللقبين لمجاملة أمير، أمير معملش حاجة واللعيبة أصلًا مش طيقاه، لكن أحمد اللعيبة بتحبه وعارفين انه راجل وجدع معاهم".
واختتم رضا تصريحاته "هتقول رضا عبد المعطي تاني هقولك حاجة تانية، أنا ليا تاريخ أكبر من أي حد في نادي الزمالك، هتتريق عليا هتريق عليك، انا مبخفش من حد غير ربنا، هتخليني هقول على الفضائح الي جوة النادي أنا بقولك اهو".