تحدث مدير المنتخب المصري الثاني المشارك في بطولة كأس العرب على قناة دي إم سي عن تصريحات المدير الفني لمنتخب مصر حسام حسن.

وقال أحمد حسن:" تصريحات حسام حسن  أثارت الجدل بشكل كبير جدًا، الكابتن حسام برضه صنّف الناس: في ناس ضدّه، وفي ناس معاه، وفي ناس بتحب، وفي ناس بتكره، وأنا شايف إن في النهاية دي كُرة قدم، في النهاية ما فيش حد فوق النقد".

 وتابع:"  طالما نقد صحي يبقى مقبول للكابتن حسام، ما فيش فيه أي مشكلة خالص، ما فيش أي ضغينة، ما فيش أي كُره،  الكابتن حسام جه بدعم كبير جدًا جدًا، والكل كان داعم للكابتن حسام كلّنا كلاعبين ، كمحللين، كنقّاد كلّنا كان في حالة دعم كبيرة جدًا للكابتن حسام".

وأكمل:"   دائمًا وأبدًا بعض التصريحات هي اللي بتجبّر الناس تتكلم ، شايفين الأداء فنيًا مش أفضل ما يكون، والموضوع عادي، ما فيش فيه أي مشكلة خالص ، وأفضل مدربين مسكوا منتخبات مصر وحققوا معاها نجاحات كان بيتم انتقادهم، ومنهم الكابتن محمود الجوهري رحمه الله عليه، أفضل مدرب جه في تاريخ كُرة القدم المصرية".

وأزاد:" أنا فاكر إن في ٩٨ تم انتقاد الكابتن محمود الجوهري لاختياره للكابتن حسام حسن وقتها، وكانت حملة كبيرة جدًا جدًا، ومع ذلك رحنا وحققنا البطولة وما كانش في أي مشكلة خالص،  في ٢٠٠٦ لما تم اختيار الكابتن حسن شحاتة، كان في انتقاد كبير جدًا للكابتن حسن شحاتة 3 بطولات حقّقهم الكابتن حسن، وكان برضه بيتم انتقاده، وناس كانت تقول لك: "ده بياخدوها بالبركة ده هو عشان راجل مبروك ده بالشيوخ" عادي وكابتن حسام البدري والله يرحمه كابتن ايهاب جلال ، الموضوع طالما في الإطار الفني أنا شايف إنه طبيعي، مفيش فيه أي مشكلة".

 وأوضح:" من ضمن الحاجات إن في وقت من الأوقات البني آدم بيبقى هو عدو نفسه، بجد بيبقى هو عدو نفسه، فأنا ما أخشاه إن الكابتن حسام يكون عدو نفسه في وقت هو مُقبل على بطولة مهمة، وكل الناس بتدعمه، ما فيش أي مشكلة خالص،  بعض التصريحات للكابتن حسام إنت عملت ماتشين كويسين، وما فيش أي أزمة إنك حتى لو شايف النهارده الناس بتتكلم على الأداء، والناس مش شايفة أداء،  الذكاء إنّي ألم الناس واحتوي الجميع وأمتص غضبهم".

وأردف:" بعض التصريحات للكابتن حسام هي اللي بتثير الجدل،  منها إنه: "أنا ما عنديش لاعيبة محترفين زي بقية الدول التانية". إحنا طول عمرنا يا جماعة بنحقق كأس الأمم الأفريقية بدون لاعيبة محترفين، ويشهد على ذلك التاريخ، مثل ٨٦ ولا عندنا لاعب محترف وحققنا كاس الأمم الأفريقية وكنا  نمتلك 3 لاعيبة محترفين فقط ، هاني رمزي، ياسر رضوان، حازم إمام،  وحققنا كاس الأمم الأفريقية

 ٢٠٠٦، ٢٠٠٨، ٢٠١٠: لا نتجاوز 3 أو 4 محترفين في كل البطولات".

واستكمل :" إحنا طول عمرنا الميزة اللي بتميزنا كمصريين إننا بنحقق بلاعيبتنا المحترفين في الداخل،  عندنا لاعيبة، وعندنا لاعيبة كويسة ، تصريح كابتن حسام عن مصطفى محمد: "أنا عندي اتنين محترفين وربع" ، تصريح يثير الجدل، وتصريح يفقد اللاعب ثقته في نفسه".