قال وكيل اللاعبين نادر شوقي عبر بودكاست "فنجان شاي"، إن أكرم توفيق كان أكثر وضوحًا وصراحة من اللاعبين اللي سبقوه في نفس الموقف، مؤكدا أن اللاعب تعرض للظلم لأنه اتوضع في كادر مش بتاعه، على إنه اختار يسافر وميقعدش مع النادي الأهلي.

وأوضح شوقي أن أكرم حاول يجدد عقده مع الأهلي من سنتين، لكنه ماكنش طالب أرقام كبيرة زي ما اتقال، وقال: "أنا اللي طلبت بعد ما الأرقام كلها طلعت في الآخر خالص، لكن من سنتين أكرم ماكنش طالب عشرين مليون ولا حاجة خالص."

وأضاف أن في إهمال حصل في قصة أكرم، وقال: "أكرم كان مصاب؟ طيب لو لاعب مصاب، هل الطبيعي إنك تجري تمضيه؟ هو دلوقتي فين؟ الموضوع محتاج ذكاء، والأهلي كان معاه الإيد العليا وكان يقدر يتحكم، لكن للأسف سابوا أكرم لغاية آخر ست شهور، وساعتها أخد قراره."

وأكد شوقي أن أكرم كان متمسك جدًا بالأهلي، وقال: "أنا بتكلم على سنتين، سنتين كاملة فيها إصابات وذهاب وإياب، ومع ذلك أكرم ماكنش بايع، كان شاري النادي الأهلي جدًا."

واستكمل: "لما تيجي تقارن بين الحالات المختلفة، لازم تبقى عارف إن أكرم ميتقارنش بيهم، هو ماكنش بايع خالص. على فكرة هو قاعد في قطر دلوقتي، بس دي حقيقة لازم الناس تعرفها."