أكد حازم إمام، نجم الزمالك السابق وعضو مجلس إدارة اتحاد الكرة المصري، أنه كان خلال فترة لعبه أحد أكثر اللاعبين ظهورًا في الحملات الإعلانية داخل مصر، مشيرًا إلى أن شعبيته لم تقتصر على جماهير الزمالك فقط، بل شملت أيضًا جمهور الأهلي.
وقال إمام، في تصريحات لقناة "أون تايم سبورت":"في أيامي، كنت بعمل إعلانات أكتر من لاعيبة الأهلي نفسهم، وكنت بشتغل مع أكبر العلامات التجارية في مصر، رغم إن بعض لاعبي الأهلي وقتها كانوا بيعملوا إعلانات برضو، لكن دي كانت مرتبطة برعاة النادي".
وأوضح :"مش شرط تكون نجم فتنجح إعلانيًا، ممكن تبقى نجم بس ليك جانب سلبي مش محبوب. أنا كنت محبوب من الكل، وعشان كده كنت من أكتر الناس اللي بتعمل إعلانات في مصر وأنا في الزمالك".
وتطرق إمام للحديث عن الفترة التي قضاها في الاحتراف الأوروبي قائلاً:"من سنة 1996 لحد 2004 كنت بلعب في إيطاليا، وبعدها رجعت لمصر، كنا بنكسب كل حاجة، وساعتها كنت بعمل إعلانات كتير جدًا، ومفيش حد كان بيحط عليّ محاذير.. حتى جمهور الأهلي كان بيحبني ومفيش مشاكل".
وواصل"دلوقتي المعلنين بقوا أغلبهم مشجعين، عاوزين يقصفوا جبهة الفريق التاني في الإعلان، مش بيفكروا بعقلية المحترف أو صاحب البيزنس. اللي بيقرر لازم يكون عنده وعي مختلف عن تفكير المدرجات".
واختتم إمام حديثه بالتأكيد على أن الأمور في السابق كانت أكثر مهنية وموضوعية في التعامل مع النجوم، بصرف النظر عن انتماءاتهم، وهو ما يفتقده المشهد التسويقي الرياضي في الوقت الراهن.