قال أحمد سيد "زيزو"، نجم الزمالك السابق ولاعب الأهلي الحالي، في تصريحات مثيرة عبر قناة "إم بي سي مصر"، إن مفاوضات رحيله عن الزمالك كانت فرصة ذهبية للنادي، لكنها ضاعت بسبب سوء الإدارة، مؤكدًا أن التعامل مع عرض نادي الاتفاق السعودي تم بتجاهل تام من إدارة الزمالك رغم جدية العرض.

وأوضح زيزو: "وصلنا لمرحلة إنهم قالوا ابعتوا حد مفوض، والراجل جاي من السعودية مخصوص، قعد يومين وأجل طيارته، لكن محدش من إدارة الزمالك رضي يقابله. مفاوض الاتفاق وصل مصر بميعاد رسمي من النادي، جاي يخلص، ومفيش حد استقبله. دي حاجة أول مرة أشوفها."

وأضاف زيزو متحدثًا عن الضغوط النفسية: "أنا بعدت 8 شهور بسوء سمعة، رغم إني ست سنين ما عملتش مشكلة. كل ده علشان ناس بتعمل شو قدام الناس. فيه عروض وجتلي، وأنا فري، وكان ممكن النادي يستفيد، بس أنا كان عندي أمل حد يتحرك بجد."

كما دافع زيزو عن والده بعد الاتهامات المتداولة حول تدخله في العقود: "أبويا جابني الزمالك سنة 2019 وجددلي مرتين، واسأل أي مسؤول في النادي لو خد جنيه واحد. لما عرض الريان جه، قال لي اقعد وابني اسمك. واحد بيبنيلك مستقبل ماينفعش تطلعه في صورة السمسار، لمجرد إن المفاوضات متعثرة."

وأشار زيزو إلى الفارق المالي بينه وبين اللاعبين الأجانب، قائلًا: "الأجانب بياخدوا مليون ونص دولار وأنا عمري ما طلبت كده. أول مرة جددت كنت باخد 9 مليون جنيه، وكان جايلي عرض بـ4 مليون دولار من برا ورفضته."

وختم زيزو تصريحاته بالتأكيد أن كل ما طالب به كان تقديرًا يتناسب مع عطائه، مضيفًا: "أنا مش طالب رقم خيالي، لكن لما تكون الأجانب بياخدوا أضعافك، يبقى من حقي أفكر، ومن حق النادي يحافظ على نجومه."