أبدى سيد معوض، المدرب السابق للمنتخب الوطني، استغرابه من محاولات البعض الزج باسم النادي الأهلي في أزمات لا علاقة له بها خلال الأيام الماضية، مؤكدًا أن القلعة الحمراء لا تسير وفق مبدأ "اشمعنى فلان"، بل تخاطب الجهات المسؤولة بشكل مباشر للمطالبة بحقوقها دون التطرق لأندية أخرى.

وقال معوض، خلال تصريحاته عبر قناة النادي الأهلي: "مش شايف أي دليل على طريقة الكلام اللي بيتكلموا بيها، والأهلي لما بيعترض على حاجة بيطلب حقه هو، ومالوش علاقة بالفرق التانية. الأهلي بيخاطب الجهة المسؤولة بشكل محترم وواضح، وبدون ما يدخل في مقارنة مع أندية تانية".

وأضاف: "فيه لغط حاصل بقاله 4 أو 5 أيام، وكل الكلام عن الأهلي، رغم إن الأهلي مش طرف لا في المسابقة ولا المواعيد الحالية. الأهلي كان معترض من البداية على ترتيب المباريات وحاجات كتير، ومع ذلك التزم باللعب".

وتابع: "الناس بتحاول تدخل الأهلي في مواضيع ملوش علاقة بيها. توقيت المباراة مش فارق معاه، الأهلي مش طرف ومتكلمش، فليه الإصرار على الزج باسمه؟".

وأكد نجم الأهلي السابق أن النادي لا يتسبب في ضرر لأي طرف عند المطالبة بحقوقه، ولا يهاجم أندية بعينها، مشيرًا إلى أن بعض الأندية الأخرى دائمة الاعتراض باستخدام مصطلح "اشمعنى الأهلي".

ووجه معوض رسالة للإعلام والجماهير: "فيه ناس بتنسى هي قالت إيه قبل كده، ولو رجعت لفيديوهاتهم من سنتين هتلاقيهم بيقولوا كلام عكس اللي بيقولوه النهاردة. لازم كل واحد يكون فاكر هو قال إيه، علشان الناس ما تجيبلكش فيديو يحرجك بعد كده".