علق أحمد شوبير الإعلامي بقنوات أون تايم سبورتس، على فوز نادي الزمالك أمام أرتا سولار الجيبوتي، وتأهله إلى دور المجموعات ببطولة الكونفدرالية الإفريقية.

وقال شوبير خلال حديثه عبر إذاعة أون سبورت: "أنا كنت مراهن أن الزمالك هيكسب أربعة ويتأهل المشكلة انه كان لازم يكسب أربعة علشان لو كان كسب أقل من أربعة كان خرج لأنه كان متأخر بهدف في الدقيقة 16 حاجة عجيبة جدا".

وأضاف: "مباريات في غاية السهولة لما الأهلي يكسب 3 و4 طبيعي لما بيراميدز يكسب 6 ده الطبيعي لما الزمالك يكسب 4 ده الطبيعي ده العادي متقولش حاجة غير كدة".

وأكمل: "لكن الدنيا امبارح الناس واقفة على طراطيف صوابعها مستنية هدف الزمالك الوحيد علشان يكسب ويتأهل لدور المجموعات لكن ده مش منطقي ومش طبيعي لما بتتكلم على الزمالك وقيمته لما تعرف قيمته شوف الجمهور بطل مباراة امبارح اتنين الجمهور وأوباما محدش تاني".

واختتم شوبير حديثه: "محدش في العالم يلعب براسين حربة.. لا مفيش عظمة في عظمة جماهير ولا عظمة مدرب ولا عظمة لعيبة الماتش ده يخلص بدري بدري لكن أنت عاوزني اجي اعمل احتفالية علشان الزمالك كسب فريق موصلش في حياته لدور المجموعات ابقى راجل مجنون مش بفهم حاجة".