تحدث محمد بركات عضو مجلس إدارة الاتحاد المصري لكرة القدم عن وجود تحامل ضد الأندية المصرية من قبل الاتحاد الإفريقي لكرة القدم "كاف" خلال الفترة الأخيرة.
وقال بركات خلال حديثه عبر قناة القاهرة والناس: "في تحامل ضد الأندية المصرية دايما بنتكلم في النقطة دي في بلاد بقت قوية جدا جوا الاتحاد الإفريقي وليها نفوذ الاتحاد الإفريقي بيعملها كل اللي هما عاوزينه".
وأضاف: "المواقف الأخيرة كلها بتثبت أن في مشاكل ما بينا وبين الاتحاد الإفريقي مش عارف ايه سببها أو ايه المنطق اللي هما بيتبعوه في كثير من المواقف سواء للأهلي أو الزمالك حتى كانت بعض التصريحات من أشخاص مسئولين في بلاد تانية على سبيل المثال أن خلاص راح زمن البطولات والأندية والبلاد اللي بتكسب بطولات إفريقيا بالتحكيم أو عن طريق الحرام وده كلام معجبناش كلنا في مصر".
وأكمل: "كان القصد على الأندية المصرية والتونسية أنهم بياخدوا بطولات ميستحوقهاش طبعا ده ملوش أي أساس من الصحة النادي الأهلي لما بياخد بطولة علشان يستحقها والزمالك نفس الكلام ومينفعش خالص أن كل السنين اللي فاتت كلها خد البطولة سنتين ورا بعض وخسر التالتة بعد ما النهائي اتلعب في المغرب في ملعب غير محايد وكل ده بسبب النفوذ في الاتحاد الإفريقي من جانب بعض المسئولين في بعض الدول احنا لما بناخد بطولاتنا بناخدها بالحلال وعن جدارة واستحقاق".
وواصل: "الموضوع فعلا محتاج اننا ننظرله نظرة تانية ولازم نعرف الفترة الجاية في ايه وايه اللي بيحصل وليه المواضيع دي بقت بتحصل خصوصا مع بلد كبيرة زي مصر الاتحاد الإفريقي موجود هنا احنا اللي مأسسين الكرة في إفريقيا".
وأردف: "وفي نفس الوقت نتمنى الأشخاص اللي هما بيشرفونا وبنتباهى بيهم أنهم موجودين في مناصب كبيرة إذا كان في الاتحاد الإفريقي أو الاتحاد الدولي يبقوا معانا وبيساندونا وبيخدموا البلد اللي احنا فيها سواء كانوا موجودين جوا أو برة".
وعند سؤاله من الأقوى داخل الاتحاد الإفريقي مصر، تونس، أو المغرب؟، قال بركات: "المفروض احنا التلاتة نقوا أقوياء داخل الاتحاد الإفريقي لكن الواقع وكل المواقف الفترة اللي فاتت بتثبتلنا أن المغرب الأقوى داخل الاتحاد الإفريقي الفترة الأخيرة".