تحدث سيد عبد الحفيظ مدير الكرة بالفريق الأول لكرة القدم بالنادي الأهلي بعد الفوز الذي حققه الفريق على حساب إنبي في المباراة التي جمعت بينهما مساء اليوم السبت ضمن منافسات الدوري الممتاز.
وقال سيد عبد الحفيظ خلال حديثه عبر قناة الأهلي: "هناك أكثر من كرة بها شك في أحقيتنا بركلة جزاء لم أشاهد اللقطات بشكل جيد من المدرجات، ولكن هناك ضربة جزاء واضحة لحسام حسن لا يمكن ألا يتم احتسابها".
وأضاف: "العالم كله بيتكلم في لقطات في المباراة عادي جدا احنا هنا عندنا حساسية كبيرة جدا وتحديدا لجنة الحكام لما تيجي تتكلم على لقطة او اتنين وكأن دي من المحرمات.. عندنا مشكلة كبيرة في الموضوع مش سببها تصريح او انتقاد في ناس مغمية عنيها عندنا مشكلة كبيرة".
وأضاف: "هل احنا باسمنا ومكانتنا مفيش ولا حكم في كاس العالم؟ مفيش غير ابو الرجال، عندنا مساعدين حكام ممتازين الناحية التانية في حاجة لازم نبصلها بمنتهى الهدوء على كابتن عصام عبد الفتاح يراجع الأمر بدل ما هو شاغل باله انه يطلع يرد علينا في كل كورة فيها شك مسابش قناة الا لما طلع اتكلم على ان الهدف غير صحيح، حصلت في الدوري الانجليزي بعدها بيوم فيقولك هما اللي غلط".
وأكمل: "حتى وهو بيقول روح القانون انت مؤمن ومصدق ان الكرة مش قانونية استخدامك للفظ يؤكد ان دي ملهاش علاقة بالقانون.. انا بسأل سؤال انت شاغل نفسك بكل حاجة لينا هل في كل المرات بتطلع بنفس الطريقة في كل القنوات، يعني كورة الونش مع محمد معروف طلعت قولت تستوجب طرد مطلعتش في كورة محمود عاشور مع الحنفي في الجيش وضربة الجزاء الواضحة مطلعتش اتكلمت".
وأردف: "دويتو بتاع عاشور والحنفي مأداش ثماره كل ماتش في مشكلة، نفسي كابتن عصام عبد الفتاح يطلع يرد يقول انا برد في كل الحالات مش في حالات الأهلي بس.. ومفيش مرة صادفت انك قولت عندنا خطأ وبنعتذر لا أنت بتطلع تقول أنا هرد بالقانون".
وأتم سيد عبد الحفيظ حديثه: "عندي معلومة لو دي حقيقية في اجتماع الحكام اللي فات قولتلهم لو سيد عبد الحفيظ طلع من على الدكة يطرد لو ده حصل يصح ولا ميصحش؟.. أمين عمر في مباراة الوداد لما راح يشوف الفار دكة الوداد كلها اعترضت مطردش حد أنا كنت بسأله راجع للفار ليه طردني.. طب لما طلعت أنا بالقانون صح هترجعلي الغرامة اللي دفعتها؟".