شن عدلي القيعي، مستشار لجنة التعاقدات والتسويق بالنادي الأهلي هجومًا ضاريًا على تجاهل بعض الهيئات الرسمية لأزمات وحقوق القلعة الحمراء خلال الفترة الحالية.

وأوضح القيعي خلال تصريحاته ببرنامجه ملك وكتابة على شاشة قناة الأهلي أن وزارة الرياضة لا ترد على مخاطبات إدارة القلعة الحمراء للمطالبة ببعض حقوقها المالية، فضلًا عن تجاهل اتحاد الكرة لأزمة تعارض مواعيد بطولتي كأس الأمم الإفريقية مع كأس العالم للأندية.

وقال القيعي:" (الاتحاد المصري لكرة القدم هو اللي يقول للكاف أنا عندي مشكلة حلوها، لكنه يغض البصر عن الأهلي، وده شأنه وطبيعته، مش طبيعته هو بس، فيه وزارة شباب مش بترد عليك لما بتقولها مستحقاتي فين ؟) ".

وأضاف:" (مين مهتم ؟ كأن الأهلي بيعاني الغربة الرياضية من المسئولين عنه سواء وزارة الشباب والرياضة أو اتحاد الكرة، الاتحاد المصري بيتفرج عليك) ".

وتابع:" (هو لما الكاف يشوف ده موقف اتحادك، إيه اللي يخليه يقلق على موقفك انت ؟ يقلق ليه ؟ من وجهة نظره هو عنده أمم افريقيا عاوز يقارنها بأمم أوروبا، هيصدّر النادي للمنتخب) ".

وواصل:" (إنت كنادي مش بتحدد لاعيبتك اللي رايحة المنتخب، الاتحاد هو اللي بيحدد، اتحاد الكرة هو اللي عنده مشكلة، هل يكون المقابل إن الاهلي يتحرم من 11 لاعب ؟ بل وأفضل 11 لاعب دولي في صفوفه ؟) ".

وتطرق القيعي لموقف هاني أبو ريدة، عضو المكتب التنفيذي في الاتحادين الإفريقي والدولي، حيث قال:" (يظل هاني ابو ريدة علامة استفهام في كل مرة تحصل أزمة مهمة ومتلقيهوش، أنا مش عارف أنا مستفيد من هاني أبو ريدة في إيه في الكاف أو الفيفا ؟ حد ييجي يقولي إلا إذا كانت في حاجات شكلية وبسيطة) ".

وأكمل:" (إذا كنت بتخاف تصطدم، شوف مندوب المغرب بيعمل ايه لفرقه، ومندوب تونس ومندوب الجزائر، تبنى موقفنا وقول ده اللي قدرت اعمله، أنا مش بقول إنه يوصلني للي أنا عاوزه، أنا بقول تبنى وإظهر على الصورة كده إنك بتقاتل من أجل حق مصر) ".

وأشار:" (فيه مشكلة تعارض بين النادي والمنتخب خش حل مشكلة مصر، اتحاد الكرة مريحه مش بيصدرله المشكلة، العلاقة لما بتبقى وثيقة أوي وشخصية أوي، فتلاقيه بيقول يا مجاهد متحرجنيش) ".

وأتم القيعي:" (المرة دي المسألة واضحة وفجة. اقف معايا، وتبنى مشكلتي وأوصل فيها للي تقدر عليه، إحنا عشمانين يا اخي فيك، وانت المفروض تتعشم معانا في بلدك ومصلحتها اللي خرجت منها لهذه المناصب) ".