هاجم الإعلامي أحمد شوبير قرار اتحاد الكرة برئاسة أحمد مجاهد بشأن عدم السماح لأي لاعب ناشيء باللعب في نادي يبعد عن مقر اقامته أكثر من 50 كيلو متر.
وقال شوبير خلال برنامجه صباح الإثنين "اتحاد الكرة اخد قرار أغرب من الخيال، كل اب وام بيحلموا ان ابنهم يلعبوا في اكبر اندية مصر، الي من طنطا واسوان واي محافظة بيروح القاهرة ولا الاسماعيلية ولا الأسكندرية علشان ينضم لأندية كبيرة".
وتابع "انا جيت من طنطا ربنا كرمني، ومتعب جه من بلبيس، وحسن شحاتة من كفر الدوار، شيكابالا جه من أسوان وغيرهم، أسماء كتير نجوم ممكن نعرفكم عليها جت من محافظات تانية".
واضاف "اتحاد الكرة اخد قرار أغرب من الغرابة، انك متتنقلش لنادي يبعد عن محافظتك اكتر من 50 كيلو، يعني لو من طنطا متقدرش تيجي القاهرة تلعب في نادي هنا لو مسافتك اكبر من 50 كيلو".
وواصل شوبير "تسال مين أخد القرار ده يقولك أحمد مجاهد، من غير قرارات او اجتماعات هو قرر كدة، مبررهم ان الأندية متفقدش مواهبها".
مختتمًا تصريحاته "بالذمة ده كلام؟، ده تهريج، لاعب مولود في مانشستر وجايله عرض في نيوكاسل، يطلع احمد مجاهد بتاع انجلترا يقولهم لا؟ قرارات عنترية فردية اتمنى نخلص منها لإن بجد ده عيب".