معوض يكشف كواليس 3 محاولات من الأهلي لضمه: الصفقة توقفت في مرة بعد قرار المحافظ



تحدث سيد معوض الظهير الأيسر السابق للنادي الأهلي عن كواليس انضمامه للقلعة الحمراء وتوقف المفاوضات في أكثر من مرة.

وقال معوض في تصريحات عبر قناة الأهلي "صفقة انتقالي للأهلي تأخرت، لكن كل شيء نصيب، الأهلي كلمني بعد ما اسلام الشاطر وبركات انضموا له، جالي صليبي والموضوع وقف شوية وطارق السعيد انضم وعاد محمد عبد الوهاب من الإمارات وفي وجود جيلبرتو شعرت ان موضوع انضمامي للأهلي انتهى خلاص".

وتابع "كان في مصر في الفترة دي في لعيبة كتير متاحة في مركز الظهير الأيسر، أقل مستوى للاعب في المركز ده وقتها كان يحصل على تقييم 8/10".

وواصل "الأمر بعدها توقف وبعد سنتين تقريبًا رجعت لمستوايا بعد ما قعدت فترة موجود في الملعب اسمًا فقط ومستوايا وحش، بدأت ارجع تاني مع الإسماعيلي في وجود ثيو بوكير، ورجع تاني الكلام مع الأهلي قبل امم افريقيا 2008".

وأضاف "الاسماعيلي اتفق برئاسة يحيي الكومي مع الأهلي، كان الاستغناء تاني يوم هتوصل الأهلي، قبل ما يتم توقيعها من منطقة الإسماعيلية الجماهير عرفت بالصفقة والدنيا اتقلبت وبقى في مشكلة كبيرة والمحافظ اقال مجلس الإدارة وتم تغيير المجلس، ف المفاوضات وقفت".

معوض واصل حديثه "وقتها كنا في المعسكر الأخير رايحين كأس الأمم، كنا بنلعب مباراة ودية في البرتغال مع أنجولا، واحنا راجعين على القاهرة قبل ما نروح غانا قولت لحسن شحاتة انا مش هينفع ارجع الإسماعيلي، انا طلعت في التلفزيون قولت عاوز انضم للأهلي وأكيد مش هعرف اكمل معاهم، لازم اشوف حل".

وأردف "شحاتة قالي تعالى معانا البطولة وشوف يمكن يجيلك عرض او حاجة وتمشي، واحنا في البطولة بعد تاني مباراة طرابزون كان بيلعب في الفريق وعاوزين ظهير ايسر اعارة بنية البيع، جاتلي من عند ربنا ومفكرتش، كان لازم اتحرك وابعد عن المشكلة".

واختتم سيد معوض "فضلت مع طرابزون لحد ما دفع الفلوس وقرر انه يشتريني، اول ما ده حصل قولت انا عاوز ارجع وانضم للأهلي، لحد ما طرابزون تعاقد معايا بشكل رسمي انا الي طلبت بعدها اني اجي الأهلي، والله الأهلي ما كان له علاقة بقصة طرابزون دي تمامًا".

استطلاع الراى


هل يحقق الأهلي لقب دوري أبطال أفريقيا؟
دوري أبطال أفريقيا - 2021/2022

الفيديوهات الأكثر مشاهدة خلال شهر