كشف سيد عبد الحفيظ مدير الكرة بالأهلي عن كواليس حديثه مع عبد الله السعيد أثناء فترة تجديد تعاقده مع الأهلي والتي أعقبها قرار الأهلي بعرضه للبيع.وقال عبد الحفيظ في تصريحات عبر قناة ام بي سي مصر: "قلت لعبد الله السعيد روح شوف مصلحتك، ممكن اعرض عليك 3-4 مليون وانت بتطالبني بـ 50 مليون جنيه ومصمم عليها، انا باحترمك وأقدرك مش ممكن اعمل خلل في التيم عشان فرد ، ممكن ناس تقول ده أسلوب غلط ، لكن انا مش شايف ان فيه اوضة لبس موجود فيها رقم فيه 100 مليون جنيه ورقم 2 مليون جنيه التوفيق هييجي منين".وأضاف مدير الكرة بالأهلي: "واحد بياخد 7 مليون والتاني 4-5 مليون مقبول جدا نسبة متفاوتة، لكن واحد بياخد 60 مليون والتاني 2 مليون، قرارات الأهلي ليست فردية ولكنها قرارات مؤسسية".وتابع عبد الحفيظ: "سياسة النجم الواحد مش سياسة مؤسسات ولا سياسة أندية ولا تجيب بطولات لكن ممكن تنجح في لحظة ، تنجح في يوم، تنجح في شهر لكن على المستوى البعيد لا يمكن تنجح، المؤسسات والأندية الكبيرة تتعامل بلوائح ونظام ليك حدود معينة الحد الأعلى كذا والحد الأدنى كذا ما بين الحد الأدنى والأعلى مش مسافة زي السما والأرض في الأول والآخر دول لعيبة مع بعض".