طلب طارق يحيى من مصطفى محمد مهاجم الزمالك بالاستمرار مع الفريق خلال الفترة المقبلة والإستمرار مع الفريق حتى إيجاد البديل.
طارق يحيى في حديثه قال: "التوقيت يا مصطفى غير مناسب، عارفين ان عندك حرص شديد على الإحتراف، شرف لينا للزمالك ان لاعب يطلع يلعب في أوروبا زي صلاح وزي نجوم كتير، بس أختار التوقيت، حق الجمهور وحق الزمالك".
وأضاف طارق يحيى: "أنا مع استمرارك لنهاية الموسم، وفي نهاية الموسم يا أخي لما تلعب في أولمبياد طوكيو يمكن تجيلك حاجة أكبر، مش عاوز تجري ورا الحاجة سيب الحاجة هي اللي تجيلك خلي عندك قناعة، عارف ان الكلام ممكن يدخل من هنا ويخرج من هنا".
وتابع مقدم برنامج زملكاوي ندائه لمصطفى محمد: "بقولك دلوقتي، كلنا بنضحي يا مصطفى وربنا هيكرمك والله لو صبرت شوية ربنا هيكرمك، احنا محتاجينك أكتر، وجمهور الزمالك عاوزك ونادي الزمالك عاوزك، مع الإحتراف وتأمن مستقبلك لازم يكون فيه نوع من التقدير للزمالك".
وأشار طاق يحيى: "مصطفى محمد الزمالك محتاجة، طارق حامد جاله السعودية وفضل الاستمرار في الزمالك، الفلوس يا مصطفى أنا اللي باعملها مش هي اللي بتعملني، الزمالك محتاجك دلوقتي على الأقل لحد ما يبقى فيه بديل يا مصطفى يمكن يكون في يناير، العرض اللي جالك ممكن يكون فيه مقابل مادي أكبير والنادي يجيب بديل".
واختتم طارق يحيى: "ارجوان وكيلك يوجهك يمكن أوليمبياد طوكيو تروح حتة أحسن وأتمنى ان انت متبصش تحت رجلك والمستقبل قدامك يابني ربنا يوفقك سواء في الاحتراف أو الزمالك وياريت جمهور الزمالك يقف مع مصطفى ويدعمه وحط نفسك مكانه وهو لازم يقدر موقف نادي الزمالك وجماهيره العريضة اللي بتحبه وتعشقه".
كشف أيمن يونس المسئول عن الكرة بنادي الزمالك أن مصطفى محمد مهاجم الفريق يريد تحقيق حلم الاحتراف الآن وعدم الانتظار حتى نهاية الموسم.
وأوضح يونس في تصريحات لقناة الزمالك بأن مصطفى محمد زملكاوي ويريد تحقيق حلم الاحتراف في أوروبا ولكن إدارة النادي من أول يوم هو الموافقة على رحيله بنهاية الموسم وليس الآن.