وجه أحمد حسن كوكا مهاجم منتخب مصر الأول لكرة القدم وفريق أولمبياكوس اليوناني رسالة إلى والده المتوفي بعد تتويجه مع فريقه بلقب الدوري.
وكتب كوكا على حسابه عبر موقع التواصل الاجتماعي انستجرام: "يمكن اللي هقوله ده ناس قليلة تعرفه عشان أنا مش بحب اتكلم في حياتي الشخصية، بس أنا والدي ده من غيره أنا مش حاجة ولا عمري كنت هبقي حاجة ولا احقق اي حاجة".
وأضاف "بابا الله يرحمه من وأتا عندي ٦ سنين وداني النادي الأهلي، كان اكبر حلم له اني اطلع لعيب كورة و يفتخر بي قدام أهله و صحابه، وعلي طول معايا في التمارين و الماتشات و لما يكون عنده شغل و مايعرفش يحضر بيخلي حد يصور الماتش عشان يتفرج عليا بعد كدة".
وأكمل "ايوه حبه لي و انه يشوفني بلعب كورة كان حاجه تانية، كبرت و جالي عرض احتراف و هو على طول في ضهري، قال لي قبل ما اسافر كلمتين مش هنساهم لاخر يوم في حياتي ( عايزك ماترجعش مصر غير وانت مشرفني بره عايز افتخر بيك وسط اهلي ) قلت له ان شاء الله يا بابا".
وواصل "سافرت وفي اول شهر، نزلت التمرين ولما رجعت كان في مطافي وبوليس كتير عند بيتي، فبصيت لاقيت شقتي كلها بتتحرق، كل حاجه كانت عندي في الشقه راحت، كلمت بابا وقلت له انا عايز ارجع مش قادر علي الغربة واللغة صعبة وبعد اللي حصل ده يمكن ربنا مش رايد أنى أكمل هنا، قال لي أنا بكرة الصبح هجيلك".
وأردف "بابا تاني يوم كان عندي وجايب لي لبس جديد كتير واداني فلوس عشان اجيب اللي عايزه وقال لي أنا جيت عشان افكرك أنك مش هترجع غير لما تشرفني وتشرف بلدك، انت فاكر انها سهله؟ الي حصل ده يقويك مش يخليك تستسلم".
وأتم كوكا "الحمد لله على كل حاجة بس انا من غير والدي ماكنتش كملت، الله يرحمك يا اطيب واحن وارجل انسان شوفته في حياتي، كان نفسي تبقي معايا وتفرح بي، ان شاء الله نتجمع تاني في الجنة".