رئيس الزمالك للاعبيه: الترجي أقوى من الأهلي 100 مرة.. وفايلر جامد «بالحكام»



عقد مرتضى منصور رئيس مجلس إدارة نادي الزمالك جلسة مع لاعبي الفريق الأول لكرة القدم بالنادي الأبيض قبل التوجه إلى الإمارات لخوض مباراة السوبر المصري أمام النادي الأهلي.

وقال رئيس الزمالك خلال جلسته مع لاعبيه "الترجي أقوى من الأهلي 100 مرة، تقدروا تكسبوا الأهلي لما تحسوا انكم أحسن وأقوى منه، متخافش منه".

وأضاف "السوبر الماضي خسرناه بسبب التشكيل الخاطئ من ميتشو، وعندما عدل في التشكيل في الشوط الثاني، أحرزنا هدفين، ولو كان هناك 5 دقائق أخرى في المباراة كنا سنفوز".

وتابع "الأهلي مش بعبع كلكوا كسبتوه قبل كدة، انتوا أقوى منهم، سيبوكم من فايلر هو مدرب جامد جدا بس بالحكام، أنا قولت قبل كدة أديني حكم عادل وVARوالزمالك مش هيخسر أي بطولة، والدليل على كدة ان كل بطولاتنا اللي فيها حكام أجانب ربنا بيكرمنا فيها".

وأردف رئيس الزمالك "قبل مباراة السوبر الافريقي لم تباع نصف تذاكرنا في الامارات، ولكن بعد الأداء الرجولي والرائع جميع التذاكر نفذت، الدنيا كلها في انتظاركم".

وأتم مرتضى منصور "أوعوا تبوظوا فرحتكم بالسوبر الافريقي، انت داخل ماتش الأهلي بنفس إرادة النصر، انت داخل تكسب الأهلي علشان تقوله انت بتكسب هنا بالمساعدة، احنا واخدين بطولات قارية أكتر من البطولات المحلية، المفروض اللي بياخد بطولة قارية يكون في المحلي جامد جدًا، هما هما نفس اللاعيبة ونفس المدرب بس مش نفس الحكام".

ويواجه النادي الأهلي نظيره نادي الزمالك مساء يوم الخميس في إطار منافسات كأس السوبر المصري، والمحدد اقامتها على ملعب استاد محمد بن زايد بنادي الجزيرة.

استطلاع الراى


ما هو القرار الذي سيتم اتخاذه لمسابقة الدوري العام؟
الدوري العام - 2019/2020