فتح رئيس نادي الزمالك النار على رموز الفريق الأبيض وهاجمهم عبر شاشات الفضائيات بعد تغيبهم عن حضور انتخابات الجمعية العمومية.
وقال رئيس النادي الأبيض في مداخلة هاتفية لبرنامج الزمالك اليوم: "في ناس عاملين نفسهم زمالكاوية ولكنهم يتمنوا الزمالك يتغلب زي العتال وسليمان والناس دي".
وتابع: "هو الأستاذ حازم إمام ده مش عضو في النادي؟ هو حضرتك ليه لم تحضر وأدليت بصوتك يا نجم؟ كابتن ايمن يونس الفيلسوف، هو حضرتك لم تعطي النادي خمس دقائق تدلي بصوتك ليه؟".
وهاجم رمز النادي، ومدرب الفراعنة الأسبق حسن شحاتة قائلًا: "المعلم الكبير حسن شحاته أبو كريم هو حضرتك مش نادي الزمالك ده تبقى انت قدوته، ما تيجي تدلي بصوتك ولا انتوا نجوم أكبر من الزمالك؟ لا انسوا الزمالك أكبر بكتير بس انا حبيت اكشفكوا قدام مصر كلها".
وواصل: "ليا عتاب على كمال درويش ومرسي عطا الله ومحمد عامر، انتوا مكرمين جوة النادي اللي ليه صالة العاب واللي ليه مش عارف ايه.. انتوا فين يا بهوات؟".
وأشار رئيس الزمالك كنوع من العقاب على رموز النادي الذي تخلفوا عن حضور الانتخابات، قائلًا: "انت فين يا محمد يا عامر انت في حديقة باسمك من بكرة هتتشال انت فين يا حسن يا شحاته من بكرة هتتشال".
وأختتم حديثه قائلًا: "كنت مستني تيجوا إمبارح تقولوا لمصر كلها احنا جاين نمارس حقنا في انتخابات الزمالك بالديمقراطية".