قال المهندس خالد مرتجي، عضو مجلس إدارة النادي الأهلي، في تصريحات لقناة "أون تايم سبورت"، إن طموح جماهير الأهلي لا سقف له، وإن هذا يشكل مسؤولية كبيرة على الإدارة واللاعبين، لكن الهدف الأهم هو إسعاد الجمهور.

وقال مرتجي: طموح جماهير النادي الأهلي معندهمش سقف، ودي حاجة بتبقى حمل كبير علينا، لكن إحنا عاوزين نسعدهم. النهاردة النادي وفّر هذه الكوبكة من النجوم المحترمة اللي تقدر تجاري الفرق العالمية، عشان المحصلة تبقى إيه؟ أسعد الجمهور الأهلاوي، 70 مليون أهلاوي."

وأضاف:أنت لما بتعمل حاجة، عشان أعضاء الجمعية العمومية يبقوا فخورين بيك، الأهلي وُلد ليكون نمرة واحد. الأهلي مبيتاخرش عن جماهيره أو أعضاءه، عشان في الآخر يبسطهم. لأن أنا بعتبر الأهلي هو المؤسسة والكيان اللي بترسم البسمة على شفاه من ينتمي ليه."

وتابع:بإذن الله تعالى، إحنا مش جايين عشان تمثيل مشرف، رغم إني اتعلمت من جوزيه من 2005، لما يتكلم يقول: أنت شرف ليك إنك تبقى متواجد في وسط هذه الكوكبة العالمية. لكن إحنا، عشان جماهيرنا واسم النادي الأهلي، أنا على يقين إن اللاعيبة بتاعتنا عاوزة تصنع تاريخ، وإن شاء الله بتوفيق ربنا سبحانه وتعالى نقدر نعمل حاجة."

وأكد:إحنا في عصر احتراف، وعندنا مع الخبرة الكافية نقدر إزاي نتعامل مع النجوم. أنا كان نفسي في زيزو من 3 سنين، أنا بعتبر إن زيزو شبهنا، بحس إنه هو زينا. أنا كان نفسي في زيزو، لأني بعتبره من أحسن لاعيبة مصر."

واختتم: "إحنا كنادي أهلي محتاجين واحد زي ده يضيف لينا. في الآخر، أنت محتاج تدعم الناحية اليمين والناحية الشمال، فكنت محتاج لاعيبة على مستوى. وزيزو نجم كبير، ووجوده في الأهلي إضافة ليه هو جدًا، كاسم النادي الأهلي هيضيف له كتير جدًا."