علّق شريف إكرامي، حارس مرمى نادي بيراميدز على قرار عدم خصم 3 نقاط إضافية من رصيد النادي الأهلي في بطولة الدوري خلال الموسم الجاري، بعد أزمة مباراة القمة أمام الزمالك.

وكتب شريف إكرامي عبر حسابه في موقع التواصل الاجتماعي تويتر: "قرار لا يحتاج خبير ليكشف عواره، ولا اللائحة محتاجة متخصص علشان يوضح ثغراتها.. المشهد مكشوف والتجميل ما بقاش ينفع".

وأضاف: "ارتعاش اللوائح، وتفصيل القرارات أصبح جزء أصيل من ثقافة المنظومة، وسبب أساسي في تدهورها.. وعشان نقدر نبني منظومة تحترم نفسها وتتطور.. ثبات القرار واستقلالية القواعد من أي عوامل خارجيه هو حجر الأساس".

وتابع: "ووسط الارتباك ده، بيظهر نوع تاني من الخطر، بيظهر ناس بتقبل الظلم والتدليس لما يكون في مصلحتها، وبتجتهد في اختراع مبررات عشان تمحي بيها شعورها بالذنب، وده للأسف بيكشف التناقض بين قيّمهم وأفعالهم".

وأكمل: "بس التبرير عمره ما بيمحي الحقيقة، بالعكس ساعات بيعرّيها أكتر خصوصًا لما نكون قدام حالة تدليس واعي ومتعمد، وده أخطر من الكذب، لأنه بيغّلف الباطل بقناع المنطق، ويوهمك ان الغلط صح".

وواصل: "كالعادة، هيتحول الجدل من مناقشة قرار مشوّه لتبادل اتهامات، وتخوين، وتشويه كل صوت مختلف، وكأن المشكلة مش في القرار، لكن في اللي بينتقده.. وعمومًا الكورة زيها زي الدنيا، قيم الناس الحقيقية بتبان فيها وقت الاختبار".

وأتم شريف إكرامي تصريحاته قائلًا: "في النهاية، كامل احترامي لكل من اختار ضميره قبل انتمائه، لأن الحق ما بقاش بيتقال مش عشان الناس نسيته، بس عشان بقوا خايفين يدفعوا تمنه".

وكانت لجنة التظلمات التابعة للاتحاد المصري لكرة القدم قد أكدت مساء أمس الخميس قبول الشكاوى المقدمة من أندية الأهلي والزمالك وبيراميدز، في أزمة مباراة القمة، من الناحية الشكلية، مع عدم جواز النظر في موضوعها، حسب لوائح رابطة الأندية.