كشف حسام البدري المدير الفني الأسبق للنادي الأهلي وطرابلس الليبي حاليا عن دور الرئيس السيسي والدولة في تأمينه هو والجهاز الفني المصري لرجوعهم لأرض مصر بسلام.
وقال البدري في تصريحات تلفزيونية: "الحمد لله العودة لمصر الحبيبة وبشكر الرئيس والاجهزة المعنية بسبب الوضع في ليبيا وبشكر الوزير اشرف صبحي لاهتمامه بينا والحمدلله بالتنسيق تم عودتنا امس".
وتابع: "احنا كنا متواجدين في الفندق بس بعد الاحداث الاخيرة والانفجارات تم التنبيه علينا بعدم الخروج نهائي من الفندق، والاشتباكات كانت قريبة وموجودة في الشوارع في طرابلس كانوا يومين صعبين".
وأكمل: "القرار اننا نسافر مصراتة كانت صعبة جدا بس كانت مع التنسيق مع الاجهزة الامنية والتدخل كان سريع جدا والسفارة ف طرابلس كان ليها دور كبير، ورغم المخاطرة للانتقال لمصراتة تم تجهيز الطيارة في وقت سريع وبشكر وزارة الخارجية والسيسي والسفارة".
وزاد: "عقدي مع اهلي طرابلس كان مستمر لنهاية الموسم ولم أفسخ عقدي مع أهلي طرابلس ولكن الناس مقدرة الظروف التي تمر بها البلاد، وعقدي كان مفروض مستمر لنهاية الموسم وكنا نسير بشكل جيد وتم اختياري أفضل مدرب في ليبيا ولكن الظروف التي حدثت خارجة عن إرادتنا وهم متفهمين ذلك "
ولفت: "سأعود للتدريب قريبا في الدوري المصري وهناك اتصالات من جانب بعض الأندية ، واللي فيه الخير هيقدمه ربنا، وأكثر شئ يسعدني هو رد فعل جماهير الأهلي، وأكتر حاجة يكون فيها تقدير من القلعة الحمراء تسعدني للغاية والسبب فيما وصلت إليه وجمهور الأهلي له مكانة خاصة في قلبي".
وأكد: "وصلني عندما كنت في ليبيا اهتمام إدارة القلعة الحمراء بي وأتمنى أن يفضل الأهلي هو الأفضل للي وصلت ليه في اسمي هو النادي الاهلي وجماهيره ليها معزة كبيرة في قلبي، وادارة الاهلي بيكون ليها في كل مرحلة مبرراتها الخاصة وبتمنى ان الاهلي يستمر في افضل حال والجماهير تكون سعيدة".
وأشار: "الفترة اللي فاتت بحكم حبي وانتمائي للنادي الاهلي كنت عاوز اقولك لما كان فيه مشاكل في النادي كنت بتصل بناس مسؤولة وبقول وجهة نظري عشان ده بيتي وعارف تقدير النادي الاهلي ليا ومجلس ادارته وبتمنى كل التوفيق للنادي الاهلي ويكون موفق مع المدير الفني الجديد خوسيه ريفيرو".
وزاد: "خبرته اه مش كبيرة بس اتمنى الاداء اللي عمله مع اورلاندو يكون بداية ويقدم حاجة كبيرة مع النادي الاهلي خصوصا ان معاه اسكواد كبير جدا واي مدرب يتمنى يكون مع الاسكواد ده أنا طبعا لو مدير فني أتمنى يكون عندي اسكواد زي ده".
واختتم: "عماد شخص مميز وانا اتعاملت معاه على المستوى المهني ولما اعتزل انا كنت مرشحه يشتغل في النادي في الإدارة هو شخص مميز وكان معايا في الجهاز الفني لما كنت مدير فني للمريخ وحصلت على الدوري هناك، والدوري أقرب للأهلي واتمنى ليه كل التوفيق وهيكون دوري مميز جدا ويسعد الجماهير" .