أكد السويسري مارسيل كولر المدير الفني للفريق الأول لكرة القدم بالنادي الأهلي، أنه لا يوجد في قاموسه لاعبًا أساسيًا وآخر احتياطيًا، وأن الجميع يشارك بشكل متقارب.

وتغلب النادي الأهلي على ضيفه سيراميكا كليوباترا بهدف دون رد، سجله حسين الشحات، في المباراة التي جمعت الفريقين مساء اليوم الإثنين على ستاد القاهرة الدولي، والمؤجلة من الجولة الـ 27 من الدوري العام.

وقال كولر في المؤتمر الصحفي بعد المباراة: "معنديش حاجة اسمها لاعب أساسي ولاعب احتياطي في لعيبة ممكن تكون على مدار الموسم لعبت أكتر لكن معنديش لاعب حافظ مكانه أو مكانه ثابت".

وأضاف: "أحيانا لاعب بيتصاب بياخد وقت علشان يرجع من الإصابة خصوصا مع ضغط الماتشات التمارين مش بتبقى مكثفة علشان اللاعب يرجع أسرع من المعتاد، ممكن دقائق اللعب بتقل شوية لكن لو بصينا على الموسم كله كمجمل عدد دقايق قريب من بعض كله بيشارك وكله بيلعب وكله مستواه متقارب".

وأكمل: "أنا بعمل روتيشن كتير خليت ناس كتير تشارك وماشيين كويس في الموسم ومحققين نتايج ومش عاوز (أعك) وأغير ده والدنيا ماشية، في نقطة مهمة أنا بختار التشكيل وقايمة المباراة اللي تكسبني بختار القايمة اللي تقدر تكسبني المباراة".

واختتم كولر حديثه: "في لعيبة مش بتبقى في أحسن حالة على اللاعب اللي مختارتوش انه يتمرن احسن ويثبت نفسه في التمرين ولو خد خمس دقايق يموت نفسه ويحاول يرجع علشان ميبقاش الفجوة بينه وبين زمايله بتزيد مع الوقت، وهو معندوش طريق غير أنه يحاول يبقى أفضل من اللي بختارهم".