خرج طارق حامد لاعب نادي الزمالك السابق واتحاد جدة السعودي حاليًا ليكشف تفاصيل عديدة في مسألة رحيله عن صفوف فريق ميت عقبة بعد توجيه بعض الاتهامات له من جانب مرتضى منصور رئيس النادي.
وقال حامد في مقطع فيديو نشره على صفحته عبر موقع التواصل الاجتماعي فيسبوك: انا بعمل الفيديو ده علشان جمهور الزمالك يعرف الحقيقة.. بالنسبة لموضوع الاصابة انا اتصابت 8 يناير دكتور النادي شخص الاصابة انها كدمة قوية ومحتاج تأهيل من 4 لـ 5 أسابيع وخدت اذن من أمير مرتضى أني اعمل التأهيل بتاعي برة مش اول مرة اعملها طول الوقت بعمل كدة علشان بحتاج حد مركز معايا بنسبة 100% ودي حاجة مش بتتوفر في النادي لأن الناس بيبقوا مركزين مع كل اللعيبة مش معايا لوحدي".
وأضاف: "لحد اول فبراير محستش بتحسن قولت اخد رأي دكتور تاني وكان تشخصيه للاصابة مش كدمة خالص وكنت أعلنت التشخيص الصح وبعدها بدأت تأهيل من الاول.. قبل ماتش الوداد في المغرب كارتيرون كان عارف اني مش جاهز ولسة بكمل تأهيل مرتضى وامير طلبوا مني اسافر مع الفريق علشان اساندهم معنويا وطلبت من أمير مرتضى انه يكلم دكتور التأهيل بتاع النادي علشان يشتغل معايا في المغرب ومتأخرش اكتر من كدة.. أمير قالي ان الدكتور عنده حالة وفاة ومش هيقدر يسافر فاقعد كمل تأهيلك في مصر يعني مرفضتش اطلع الطيارة زي ما اتقال".
وواصل: "وقبل ماتش الوداد في مصر فيريرا قالي انا محتاجك في المعسكر أنت كابتن من كباتن الفريق.. اتفقت معاه اني ادخل المعسكر بس مكونش موجود في قايمة الماتش، قبل ماتش بترو أتلتيكو قعدت مع المدرب واتفقنا اني اخد جزء من الماتش وبعدها رجعت العب بشكل عادي بعد كل ماتش في الدوري كنت بحس بألم وكان بيزيد مع الماتشات".
وأكمل: "لما اتوقفت طلبت من فيريرا اني اسافر المنصور علشان اروح لدكتور هناك، وتواصل وكيلي مع دكتور تأهيل إسباني، كنت بحاول في أكتر من اتجاه، وخدت موافقة بعدها للسفر إلى ألمانيا ومكانش فيه ميعاد للعودة لأن محدش كان عارف الدنيا فيها ايه، وبعد العودة قدمت كل الأوراق التي تثبت أنني كنت أخضع لبرنامج تأهيلي، وكان قرار عدم مشاركتي فني وإداري".
واستطرد: "بخصوص التجديد أنا قعدت مع لجنة حسين لبيب ومختلفناش التجديد كان مجرد وقت اللجنة مشيت ورجع مجلس الإدارة من نوفمبر لمارس محدش قعد معايا.. يوم 3 مارس رئيس النادي كلمني وروحتله أنا ووكيلي الرقم اللي اتقال في الاعلام متعرضش عليا كل اللي طلبته مهلة للتفكير".
وأتم طارق حامد حديثه: "بعد ماتش الوداد فوجئت ان النادي أعلن انه مش هيجددلي عبر وسائل الإعلام، وفهمت أن الجلسة اللي قعدتها مكانتش جدية ومكانش في نية للتجديد".