كشف محمد مصيلحي رئيس مجلس إدارة نادي الاتحاد السكندري عن تفاصيل اتفاقه مع النادي الأهلي لانتقال مروان عطية لصفوف القلعة الحمراء خلال فترة الانتقالات الشتوية الجارية.
وقال مصيلحي خلال حديثه عبر قناة أون تايم سبورتس: "وصل لنادي الاتحاد خلال الفترة الماضية عرضا من النادي الأهلي وبيراميدز، وأحد الأندية السعودية، وجدت مكالمة هاتفية من أمير توفيق وقالي حابين نتكلم في الموضوع قولتله ارجو ان الحديث يكون مع كابتن الخطيب لو فعلا في نية".
وأضاف: "بعدها لقيت مكالمة من الخطيب وقالي انا جاي في اسكندرية وحابب اقعد معاك ولقيت كابتن الخطيب مشرفني في البيت ومعاه عدلي القيعي وامير توفيق قعدنا اكتر من ساعتين قالي أن النادي الأهلي مشارك في كاس العالم وعاوز يدعم ببعض اللاعبين".
وأكمل: "أبلغت الكابتن الخطيب أنه اتعرض علي من نادي الزمالك كذا وكذا (20 مليون جنيها و4 لاعبين) وارجو ان العرض يبقى اكبر.. وبالفعل الأهلي عرض مبلغ أكبر من الزمالك وأعتقد أنه اعلى سعر لاعب خلال الفترات السابقة.. العرض مغري".
وواصل: "واللي حصل اننا اتفقنا على كل الأمور مع النادي الأهلي وكابتن الخطيب قعد معانا ساعتين بكل احترام وكابتن الخطيب استأذن ونزل قولتله علشان اكون امين وواضح حضرتك عرضت العرض لكن لازم اعرض الموضوع على المستشار مرتضى منصور بعد ما حضرتك ما تنزل اللي حصل فعلا اني بعد الزيارة كلمت المستشار مرتضى منصور وقولتله حصل كذا وكذا وانا كلمتك على التليفون على الوعد اللي كنت قايله بعدها كلمني تاني قولتله انا طالب حاجة واحدة لو في موافقة للاعب رغبة اللاعب هي اللي تحسم الأمر".
وأكمل: " الأهلي اتحرك جامد وبعتلي موافقة اللاعب كتابيا.. اللاعب موقع للزمالك؟ الامضا ملهاش اي قيمة طالما في تعاقد مع النادي ومعنديش خلفية هو وقع ولا لا انا عقدي مستمر مع اللاعب 4 سنوات".
وتابع: "كنا عاوزين مع العرض المالي 2 لعيبة اتعرض عليا 4 لعيبة الجهاز الفني اختار عمار حمدي ومحمد محمود.. كلام كتير طلع أن عمار ومحمود مش عاوزين الاتحاد كل ده غير صحيح عمار قالي شخصيا ان نادي الاتحاد قيمة كبيرة وبيحب جماهيره ويتمنى انه يكمل الفترة الجاية في نادي الاتحاد قال الكلام ده للخطيب وعبد الحفيظ هو ومحمد محمود".
وأتم مصيلحي حديثه: "وانا بتكلم دلوقتي الامور ماشية في نصابها الصحيح المفترض ان خلال الساعات القادمة الكلام ده يتحط على توقيعات وامضاءات، بالنسبة للثنائي المعار ستكون مدة الإعارة 6 أشهر قابلة للتجديد لموسم آخر".