تحدث الإعلامي أحمد شوبير عن موقف عبد الرحمن مجدي لاعب نادي الإسماعيلي من الانتقال للأهلي أو الزمالك بعد ازمة اللاعب الأخيرة مع الدراويش.
وقال شوبير عبر برنامجه الإذاعي صباح اليوم الثلاثاء "انا مقتنع بعبد الرحمن مجدي جدًا، لما حصل مشاكل مع الإسماعيلي في كلام انه ينضم للزمالك".
وتابع "اي لاعب كدة لما بينتقل من الاسماعيلي للزمالك بيكون العلاقة والحب والحنية واحنا ولاد عم، ومش بيكون وقتها تدمير للفريق وتكسير للإسماعيلي، لكن لو تردد اسم لاعب مع الأهلي يبقى الأهلي بيهدم الفريق".
واضاف "دول ولاد عم ودول ولاد ايه يعني؟ حاجة صعبة جدا ما اللعيب هيمشي من عندك يروح اهلي ولا ترسانة ولا زمالك ولا ليفربول حتى".
وواصل "طب ما الاسماعيلي هيعرض اللاعب للبيع مثلا ما أي نادي يقدم عرض يكون اهلي ولا غيره هي الفكرة هو هيمشي ولا مش هيمشي؟".
وأردف شوبير "الأهلي كان له موقف مع حسني عبد ربه وحمزة الجمل وكنت شاهد على ده والعقود والتوقيعات موجودة لكن قالوا خلاص اتفضل عقدك مادام في مشكلة واعتراضات ومع شيكابالا وجمال حمزة وغيره".
مختتمًا تصريحاته "في ناس بتحب تنفخ في النار، الاسماعيلي هيوافق على انتقال عبد الرحمن مجدي للزمالك لو طلب النادي ضمه".