تحدث معتمد جمال المدرب العام السابق لمنتخب مصر الأولمبي عن واقعة عبد الرحمن مجدي خلال فترة تواجد المنتخب المصري في طوكيو للمشاركة في دورة الألعاب الأولمبية.
وقال معتمد في تصريحات تلفزيونية أمس الإثنين "يوم مباراة الارجنتين كنا نازلين رايحين الماتش وشايفين ان في قلق بيحصل، قابلت شوقي غريب وحاسس انه متوتر او قلقان".
وتابع "تعجبت من تصرفات شوقي غريب، احنا لاعبنا اسبانيا ومكنش في القلق ده، في ناس كتير لابسة بدل رسمية، قولتله في مشكلة قالي اه بس بعد الماتش نتكلم، كلام شوقي غريب كان كله قلق وواضح انه متاثر جدًا، أنا قلت ان في جريمة حصلت".
وأضاف "حصل جرائم كتير في معسكرات المنتخب من قديم الأزل وفي لعيبة اترحلت وفي ناس رجعت واتوقفت لكن واقعة عبد الرحمن موصلش للمرحلة دي".
وواصل معتمد " تقريبا علشان الاحترام زيادة قوي هناك ف مجرد المعاكسة أو الكلام بقى تحرش لفظي لكن والله العظيم ما في ايد اتمدت على ايد حتى".
واستكمل " عبد الرحمن لو غلط هقول هو غلط، لكن الموضوع كان مجرد كلام، واتقاله لا غلط بلاش كلام معاكسة ف قالها انا اسف وكدة ف كان الموضوع اختلاف ثقافات وقتها وقالت بيكلمني ويعاكسني".
وأردف معتمد "طريقة الاعتذار حتى لم تكن مقبولة، حاول يديها حاجة على سبيل الترضية لكن الحركة اتفهمت غلط لكن الولد مغلطش، وطريقة الكلام مكانتش صح من الأول لكن هو معملش جريمة الي توقعها البعض والموضوع كبر ومتلمش".
وأختتم تصريحاته "الكلام ده لو حصل في بلد تانية مكنش حاجة حصلت والموضوع اتلم في ساعة، لكن في اليابان كل حاجة مظبوطة".