وجه عمرو أديب رسائل نارية للتوأم حسام حسن وإبراهيم حسن بعد اختيار الثنائي لقيادة منتخب الفراعنة الفترة المقبلة بعد رحيل فيتوريا.
1- "احنا معانا مدرب ما خدش بطولة، انما الناس كلها كل ما يحصل حاجة يقولك نجيب حسام حسن فارجوا ان انا افكر حضراتكوا ان حسام حسن هو اختيار الجماهير المصرية ، ما حدش يجي يقول بعد كده مين اللي جاب حسام وإبراهيم زي ما قالوا على اللي قبليه مين اللي جابه فاللي جابه زن المصريين هاتولنا حسام حسن، ده هو اللي يعرف يربيهم هو اللي يعرف يضبطهم هو اللي عنده الروح هاته حسام وإبراهيم فانا بس بذكركم من البداية ان حسام حسن وابراهيم حسن هو اختيار المصريين المفضل "
2- "ما اعرفش ان المدرب روح حكاية انه روح دي والحماس واصله عارفهم ولما يزعقلهم وهيخافوا منهم اصله حسام ما بيرحمش هو احنا جايبين مدرب ولا جايبين مدير مدرسة احنا جايبين حد عنده خطط حد عنده اساليب تدريب حد عنده مدربين احمال "
3- "الراجل ده جاي يلعب 4 ماتشات، وان انت توصل وبتاع ما لوش علاقة لا بالروح ولا بالحماس ولا انك مصري ولا ان ابويا مصري ولا اي حاجة"
4- "متحملوناش جميلة انه هيعامل صلاح كويس مش جميلة يعني، طبيعي تعامل صلاح وغير صلاح كويس يعني مش حاجة يتقال ايه يا جماعة معقولة ده احنا هناخد بالنا منه بس ياخد باله احنا بقى ما بندلعش الله انت بتهدد ولا بتطبطب ولا بتعمل ايه".
5- "هي جميلة انك هتعامل احسن لاعب في تاريخ مصر كويس؟ جميلة يعني؟ ده صلاح، في لعيبة ليها وزن زي ما كريستيانو في البرتغال زي ميسي في الارجنتين زي نيمار في البرازيل ليه كيان ليه مكانة ما ينفعش تجيبه من الأول كده تقوله بقولك ايه انت زيك زي لا ما فيش حاجة كده انا مش زيي زي دول كلهم"
6- "انا بالنسبة لي حسام وابراهيم حسن نتايج، ايه النتيجة جبت نتايج كويسة انا مبسوط ما جبتش نتايج كويسة متشكرين قوي وانت ما قدامكش مشوار صعب يعني مش حاجة مشكلة"
7- " يقولك شفت الروح شفت الغيرة على مصر طب هو المدربين الاجانب اللي كانوا بيلعبوا مع كل الفرق التانية ما كنش عندهم غيرة على الفرق يا جماعة الكرة مش كده الكرة مش كده الكرة خطط الكرة دراسة الكرة رخصة دولية الكرة دورات خدتها في التدريب الكرة بطولات عملتها"
8- "حسام اعظم لعيب في تاريخ مصر من اعظم اللعيبة ارقام واحصائيات وكل حاجة بس كمان في حاجة مهمة اسمها ايه الصفات الثابتة في الظروف المتغيرة يعني انت شايفه كده في المؤتمر الصحفي هادي ونادي وجميل حطه تحت ضغط بقى"
9- "مرة حد يقول الحقيقة ويتكلم مشكلة حسام ايه وإبراهيم ان تحت الضغط يظهر أسوأ ما فيهم هم لا يستطيعوا العمل تحت ضغط ولذلك يجب ان هم يتصرفوا بطريقة وبأخرى ان يعرفوا يعيشوا تحت الضغط وعندما تكون مدربا لمنتخب مصر وداخل تصفيات كاس العالم انت تحت ضغط بين ويجب ان تتحمل كل انواع الضغوط هي دي مشكلة حسام وابراهيم اللي ما حدش عايز يقولها"
10- "كل واحد يقولك ايه ، اللي حصل حصل بقى ويحط ايده كده طب يعني ايه اللي حصل حصل لا ما خلاص الراجل ده بقى مدربنا يجب ان احنا نحسن له النصيحة يا عمي انت يجب ان تعرف كيف تتعامل تحت الضغط مش فجاة في ماتش جيت تلعبه حصل مشكلة هتروح لافف وواخد طوبة ورامي الناس بالطوب انا بتكلم اهو بصراحة رغم طبعا الناس بتزعل من الكلام انما الصفات الثابتة في الظروف المتغيرة انت مشكلتك جواك مش براك التحدي عندك قدامك فمدرب منتخب مصر غير مدرب المصري او او الزمالك او الاسماعيلي ده حاجة وده حاجة تانية انت في مكانة تانية خالص وبتتعامل مع لعيبة تانية خالص"
شاهد تصريحات عمرو أديب النارية ضد حسام وإبراهيم حسن