شنّ عماد متعب، نائب رئيس رابطة الأندية هجومًا حادًا على منتقدي نظام قرعة كأس الرابطة التي جرت أمس الإثنين، وشهدت حالة من الجدل، نظرًا لنظامها الغريب على الكرة المصرية.

وقال متعب في تصريحات عبر قناة النادي الأهلي:" (مش مشكلة تبقى مش فاهم، المشكلة تبقى جاهل، الناس اللي بتتكلم أو الناس اللي مش فاهمة أو الجهلة اللي بيتكملوا إننا ناس مش محترفين أو إننا بنعمل قرعة موجهة.. مش لاقي كلام أقدر أقوله) ".

وأضاف: "حددنا رؤوس المجموعات وفقًا لتصنيف الأندية في آخر موسم، لم نستعين بتاريخ الأندية، لو استعنا بتاريخ الأندية سنضع الـ 18 فريقًا على رؤوس المجموعات، وما فعلناه هو الذي يحدث في كل بطولات العالم، وعلى سبيل المثال دوري أبطال إفريقيا يتأهل له صاحبا المركز الأول والثاني في الدوري".

وتابع: "عندما دشّنا كأس الرابطة قررنا تقسيم الفرق على 3 مجموعات نظرًا لأن الموسم الجاري هو موسم استثنائي، ولكن في الموسم المقبل المسابقة ستُلعب بخروج المغلوب".

وواصل:" (الأندية اللي بتلعب على ملعب واحد حطيناها لوحدها، الاتحاد وفاركو وسموحة كل فرقة هتروح مجموعة، مش موجهين المجموعة.. فيه فرق بين إنك تبقى مش فاهم وفرق إنك تبقى غبي. مش لاقي كلام أقوله) ".

وأكمل:" (فيه ناس بتهاجم لمجرد الهجوم وهي مش فاهمة. أتمنى أنهم يسألوا ويفهموا عشان هيبقى شكلهم وحش.. إحنا بنشتغل في وقت قصير جدًا ومعندناش أي موارد.. كأس الرابطة ده مكانش موجود، عملناه ووفرنا على الأندية ومش هيدفعوا فلوس وهندفعلهم فلوس إيجار الملاعب) ".

واستطرد:" (قرعة الدوري مكانتش موجهة ليه ؟ عملناها بشفافية والأهلي والزمالك لعبوا في الاسبوع الثالث، معندناش حاجة اسمها قرعة موجهة.. اللي بيتكلم ده غبي.. انتقدنا زي ما انت عاوز بس انتقدنا بواقع وبعلم وبمعلومة وبحقائق مش انتقاد لمجرد إنك مش فاهم) ".

وأتم متعب:" (لو مش فاهم إسألنا وهنفسرلك وهنشرحلك ليه كأس الرابطة اتعملت بالشكل ده.. يا جماعة اسألونا معندناش مشكلة هنوضح وهنرد لكن احنا لا بنوجه قرعات ومش هنشوف لا كرة سخنة ولا كرة ساقعة.. الكلام فعلا يضايق) ".

يُذكر أن النادي الأهلي يتواجد في المجموعة الثانية بكأس الرابطة المُقرر انطلاقها يوم 12 يناير الجاري، رفقة فرق الإسماعيلي والمقاولون العرب وسموحة والجونة والبنك الأهلي.